गृह मंत्री ताम्रध्वज साहू नगर निगम रिसाली क्षेत्र म 3.29 करोड़ के 62 बुता के करिन भूमिपूजन

अंजोर.रायपुर, 25 जून 2021। गृह अउ लोक निर्माण मंत्री ताम्रध्वज साहू ह दुर्ग जिला म नगर निगम रिसाली क्षेत्र म 3 करोड़ 29 लाख 13 हजार रूपिया के लागत के आने-आने विकास बुता के भूमिपूजन करिन। ओमन नगर निगम के उपयोग के खातिर आने-आने गाड़ी ल भी हरा झण्डी देखाके रवाना करिन। मंत्री श्री साहू भूमि पूजन के बाद नागरिक ले गोठबात करत किहिन के रिसाली नगर निगम क्षेत्र म पहिली बार बड़े पैमाना म विकास बुता के खातिर भूमि पूजन करे जात हावय। 

ओमन किहिन के कोरोना बीमारी के सेती भूमि पूजन कार्यक्रम केवल औपचारिकता हावय। मानव जीवन कोनो संकट म न आए ये हमर पहिली प्राथमिकता हावय। अब राज्य सरकार सुरक्षा के संग विकास बुता ल गति दे के फइसला लिस। गृह मंत्री ह किहिन के मानव जीवन बहुमूल्य हावय। इही सेती कोरोना संक्रमण ले बचाव के खातिर वैक्सीन लगवाए अउ अनिवार्य रूप ले मास्क पहनव।

गृह मंत्री श्री साहू ह शीतला मंदिर टंकी मरोदा म 95 लाख 18 हजार रूपिया के 24 बुता, हनुमान मंदिर स्टेशन मरोदा म 99 लाख 81 हजार रूपिया के 19 बुता अउ दशहरा मैदान नेवई भाठा म एक करोड़ 34 लाख 14 हजार रूपिया के 19 बुता के खातिर भूमि पूजन करिन। ओमन शिलालेख के अनावरण करिन अउ नेवई भाठा म भूमि पूजन के बाद गैती ले खुदाई करके मंच निर्माण बुता के शुभारंभ करिन। गृह मंत्री ह नगर निगम रिसाली के उपयोग के नवा वाहन इलिवेटर, टिप्पर डम्फर, काउ कैचर, सम्शन मशीन अउ शव वाहन के हरा झंडी देखाके निगम कार्यालय के खातिर रवाना करिन अउ नागरिक सेवा के खातिर वाहन उपलब्ध होए म बधाई दीस। 

गृह मंत्री ह किहिन के अगले दू महीना म रिसाली निगम क्षेत्र म रहइया नागरिक के खातिर 30 बिस्तर अस्पताल, कॉलेज अउ इंग्लिश मीडियम स्कूल उपलब्ध होही। ओमन किहिन के जगह चयन के प्रक्रिया अउ औपचारिकता के पूरा करके सेवा शुरू करे जाही। ओमन नागरिक ले मुलाकात के बखत सड़क, नाली, बिजली अउ पानी संबंधी शिकायत के दूरिहा करे प्रभारी उपअभियंता ल निरीक्षण करके बुता योजना तइयार करे के भी निर्देश दिस। ए मउका म नगर पालिक निगम के आयुक्त प्रकाश कुमार सर्वे सहित स्थानीय जनप्रतिनिध अउ बड़ी संख्या म नागरिकगण उपस्थित रिहिस।