जिला सहकारी केंद्रीय बैंक बिलासपुर के पदभार ग्रहण म शामिल होइस मुख्यमंत्री

अंजोर.रायपुर, 23 जुलाई। जिला सहकारी केंद्रीय बैंक बिलासपुर के पदभार ग्रहण कार्यक्रम म वर्चुअल रूप म शामिल होइस मुख्यमंत्री दाऊ भूपेश बघेल। ये मउका म ओमन किहिन के प्रदेश म किसान मन के हित म केऊ सहकारी गतिविधि संचालित करे जात हावयं। राज्य सरकार के ये प्रयास हावय के जादा ले जादा लोगन सहकारिता के माध्यम ले लाभान्वित होंवे। सहकारिता आंदोलन ले किसान मन के संग जादा ले जादा नागरिक जुड़े ये प्रयास होना चाही।

जिला सहकारी केंद्रीय बैंक बिलासपुर के नवनियुक्त अध्यक्ष प्रमोद नायक के पदभार ग्रहण कार्यक्रम आज सहकारी बैंक बिलासपुर के प्रांगण म संपन्न होइस। जेमा सहकारिता मंत्री डॉ. प्रेमसाय सिंह टेकाम विशेष रूप ले उपस्थित रिहिस। ए मउका म मुख्यमंत्री ह बैंक के अध्यक्ष प्रमोद नायक ल बधाई अउ शुभकामना देत किहिन के केंद्रीय सहकारी बैंक के काम सुचारू रूप ले संचालित होचे येकर खातिर बड़े जिम्मेदारी नवनियुक्त अध्यक्ष नायक ल मिले हावय। ओमन किहिन के सहकारिता अधिनियम म केऊ संशोधन करके अधिनियम ल सरलीकरण करे गे हावय, जेकर ले सहकारिता आंदोलन ले जादा ले जादा लोगन लाभान्वित हो सकें। सहकारी बैंक ले किसान मन के खाद, बीजहा के वितरण करे जात हावय। अब राजीव गांधी किसान न्याय योजना, गोधन न्याय योजना, लघु वनोपज खरीदी उक भी सहकारिता के हिस्सा हावय। 

कार्यक्रम म उपस्थित सहकारिता मंत्री डॉ. प्रेमसाय सिंह टेकाम ह अपन संबोधन म किहिन के छत्तीसगढ़ सरकार डहर ले किसान मन के हित के खातिर अभिनव योजना बनाये गे हावयं। ए मामला म छत्तीसगढ़ मॉडल राज्य बनत हावय। ओमन किहिन के सहकारिता आंदोलन किसान मन के खातिर जरूरी हावय। छत्तीसगढ़ सरकार ह त्रिस्तरीय सहकारी बैंक के बेवस्था करके सहकारिता आंदोलन ल मजबूत बनाये के बुता करत हावय। धान खरीदी, खाद, बीज, दवा सहकारी बैंक के माध्यम ले किसान मन ल सुलभ हावय। पहिली धान बिक्री के खातिर किसान मन ल बड़ दिक्कत होत रिहिस, फेर सरकार ह सुव्यवस्थित खरीदी के बेवस्था बनाई हावय। आज धान बेचे के एक हफ्ते के भीतर किसान मन के खाता म पइसा आ जात हावय। किसान मन के सुविधा के खातिर नवा सहकारी समिति गठित करे गे हावयं। ओमन बताइन के राज्य म समिति मन के संख्या 1300 ले बढ़ाके 2058 करे गिस हावय। किसान मन के करजा माफी करे गिस। राजीव गांधी किसान न्याय योजना, मुख्यमंत्री गोधन न्याय योजना ले किसान मन के आर्थिक स्थिति ल मजबूत बनाये के बुता करे गे हावय। 

कार्यक्रम ल छत्तीसगढ़ राज्य किसानकल्याण बोर्ड के अध्यक्ष सुरेन्द्र शर्मा, छत्तीसगढ़ पर्यटन मंडल के अध्यक्ष अटल श्रीवास्तव, अपेक्स बैंक के अध्यक्ष बैजनाथ चंद्राकर, नगर निगम बिलासपुर के महापौर रामशरण यादव, विधायक धरमजीत सिंह ह भी संबोधित करिन। कार्यक्रम म जिला पंचायत बिलासपुर के अध्यक्ष अरूण सिंह चौहान अउ आन जनप्रतिनिधि सहित बैंक के अधिकारी, कर्मचारी, किसान उपस्थित रिहिस।