छत्तीसगढ़ के प्राकृतिक सौंदर्य, पर्यटन, ऐतिहासिक अउ पौराणिक धरोहर ल विश्व मानचित्र लाये के जरूरत हावय : मुख्यमंत्री दाऊ भूपेश बघेल

छत्तीसगढ़ पर्यटन मण्डल के अध्यक्ष, उपाध्यक्ष अउ सदस्य के पदभार ग्रहण कार्यक्रम म मुख्यमंत्री शामिल होइस

अंजोर.रायपुर, 26 जुलाई। प्राकृतिक सौंदर्य ले भरे छत्तीसगढ़ जंगल, पहाड़, नदि ले आच्छादित प्रदेश हावय। इहां 44 प्रतिशत जंगल, बारहमासी नदिया, बांध, सुंदर झरना, ऐतिहासिक अउ पौराणिक धरोहर हावय। इही ल सहेजे अउ विश्व मानचित्र म लाने के जरूरत हावय। भगवान श्री राम ह अपन वनवास काल के सबले जादा समय छत्तीसगढ़ म व्यतीत करे हावय। चंदखुरी स्थित महतारी कौशल्या के मंदिर, तरिया अउ पूरा परिसर के सौंदर्यीकरण कराये जात हावय। शिवरीनारायण के पर्यटन के दृष्टि ले विकसित करे जात हावय। छत्तीसगढ़ पर्यटन मण्डल के अध्यक्ष, उपाध्यक्ष अउ सदस्य के पदभार ग्रहण कार्यक्रम म शामिल मुख्यमंत्री ह किहिन के छत्तीसगढ़ के सिरपुर म दस वर्ग किलोमीटर म प्राचीन बौद्ध विहार, बौद्धकालीन मूर्ति अउ भवन के अवशेष हावय। इही ल पर्यटन के दृष्टि ले विकसित करे के जरूरत हावय।

मुख्यमंत्री भूपेश बघेल आज विधानसभा परिसर कार्यालय के सभाकक्ष ले छत्तीसगढ़ पर्यटन मण्डल के नवनियुक्त अध्यक्ष अटल श्रीवास्तव, उपाध्यक्ष श्रीमती चित्ररेखा साहू अउ सदस्य द्वय नरेश ठाकुर अउ निखिल द्विवेदी के पदभार ग्रहण कार्यक्रम के वर्चुअल रूप ले सम्बोधित करत रिहिस। मुख्यमंत्री ह पर्यटन मण्डल के नवनियुक्त पदाधिकारी मन के बधाई अउ शुभकामना देत आगू किहिन के छत्तीसगढ़ के विभिन अंचल म निवासरत विशेष पिछड़ी जनजाति के पण्डो, बैगा, कमार, अबूझमाड़िया के जीवन शैली के बारे म लोगन जानना अउ समझना चाहत हावयं। येकर खातिर हमन ल ये इलाका म पर्यटक मनके खातिर सुविधा विकसित करे के जरूरत हावय। ओमन प्रसिद्ध चित्रकूट वाटर फॉल, सरगुजा जिला के रामगढ़ के पहाड़ी म पांच हजार साल पहिली के प्राचीन नाट्यशाला, कुटुमसर गुफा के उल्लेख करत किहिन के पर्यटन के दृष्टि ले छत्तीसगढ़ गजब समृद्ध राज्य हावय। छत्तीसगढ़ पर्यटन मण्डल के ये दायित्व हावय के वो ह राज्य के पर्यटन जगह के सहेजे अउ संवारे के संग पर्यटक मनके खातिर ये ठऊर मन म सुविधा विकसित करे। पर्यटन के विकास ले राज्य म रोजगार भी बढ़ही।  

ए मउका म छत्तीसगढ़ पर्यटन मंडल के नवनियुक्त अध्यक्ष अटल श्रीवास्तव ह किहिन के मुख्यमंत्री भूपेश बघेल ह राज्य म लोककला अउ संस्कृति के बढ़ावा दे हावय। छत्तीसगढ़ राज्य, प्रकृति के अनुपम उपहार हावय। ओमन आदिवासी कला अउ संस्कृति ल विश्व मंच म लाने अउ भगवान श्री राम वन गमन पथ के पर्यटन जगह के रूप म विकसित करे के मुख्यमंत्री भूपेश बघेल के प्रयास के सहरावत किहिन के छत्तीसगढ़ पर्यटन मण्डल ‘अतिथि देवो भवः‘ के सिद्धांत म काम करही। पर्यटक मनके सुख-सुविधा अउ सुरक्षा हमर जिम्मेदारी होही। प्रबंधन संचालक यशवंत कुमार ह छत्तीसगढ़ म आने-आने रकम ले टूरिज्म ल बढ़ावा दे के खातिर करे जात प्रयास के जानकारी दीस।