अंजोर.रायपुर, 31 जुलाई। मुख्यमंत्री दाऊ भूपेश बघेल ह राजधानी रायपुर के रामकृष्ण केयर हॉस्पिटल म लिवर प्रत्यारोपण के जटिल शल्य क्रिया ले नया जीवन पाये 6 महीना के लइका ताक्षी के स्वस्थ अउ सुदीर्घ जीवन के कामना करिस। ये मउका म ओमन हॉस्पिटल पहुंच के लइका के घर वाला अउ डॉक्टर मन ले मुलाकात करिस अउ ताक्षी के स्वास्थ्य के जानकारी लिस। ओमन ए जटिल शल्यक्रिया के सफलता के खातिर हॉस्पिटल के डायरेक्टर डॉ. सन्दीप दवे अउ उंकर टीम के बधाई दीस।
डॉ. दवे ह मुख्यमंत्री श्री बघेल के बताइन के रायपुर निवासी लव सिन्हा के 6 महीना के लइका ताक्षी बिलारी अग्रेसिया नामक लिवर के गम्भीर बीमारी ले ग्रसित रिहिस। ये बीमारी लइका म जन्मजात होथे, जेमा पित्त के नली ब्लॉक होए के सेती ले पीलिया बाढ़त जाथे अउ लीवर खराब होए लगथे। जेकर उपचार के खातिर लीवर प्रत्यारोपण के जरूरत होथे। परिवार के आर्थिक स्थिति ठीक नइ होए के सेती लइका के परिजन ओकर इलाज नी करा पावत रिहिस, फेर छत्तीसगढ़ सरकार के स्वास्थ्य योजना मन ‘मुख्यमंत्री विशेष स्वास्थ्य मदद योजना अउ डॉ. खूबचंद बघेल स्वास्थ्य मदद योजना’ के मदद ले नोनी ताक्षी के फोकट म अउ सफल ऑपरेशन सम्भव हो पाइस। जानबा हो के लीवर प्रत्यारोपण के खातिर लव सिन्हा ह अपन लिवर के एक हिस्सा दान करके बेटी ल नवजीवन दे हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।