सिंचाई पंप बर नवंबर तक मिल जही बिजली : मुख्यमंत्री दाऊ भूपेश बघेल

अंजोर.रायपुर, 26 जुलाई। मुख्यमंत्री भूपेश बघेल ह आज विधानसभा म एक सवाल के उत्तर देत किहिन के अवइया नवंबर महीना तक राज्य म सिंचाई पम्प के विद्युत कनेक्शन के सबो लंबित मामला निराकृत करे जाही। ओमन किहिन के किसान मन के हित सरकार के प्राथमिकता हावय। मुख्यमंत्री ह किहिन के कोरोना संक्रमण के बावजूद भी राजय म सिंचाई पंप ल विद्युत कनेक्शन दे जाये के बुता जारी हावय। बीते पांच महीना म 11 हजार 661 सिंचाई पंप ल कनेक्शन दे जा चुके हावय। ओमन सदन के ए बात के खातिर आश्वस्त करिन के नवम्बर 2021 तक बांचे विद्युत पंप ल कनेक्शन दे दे जाही।

जानबा होवय के मुख्यमंत्री श्री बघेल ह विधानसभा के बजट सत्र के बखत किसान मन के 35 हजार 161 सिंचाई पंप के ऊर्जीकरण के घोषणा करे रिहिस। येकर परिपालन म अब तक 11 हजार 661 सिंचाई पंप ल बिजली कनेक्शन देदे गे हावयं अउ 23 हजार 500 सिंचाई पंप ल कनेक्शन दे के बुता प्रगति म हावय।

इहां ये जानबा होवय के राज्य शासन डहर ले सिंचाई पंप के ऊर्जीकरण के खातिर जरूरी विद्युत लाइन के विस्तार बर समय-समय म वित्तीय मदद उपलब्ध कराये जात हावय। अभी के बेरा समय म सबोच पंप के खातिर विद्युत लाइन विस्तार जरूरी हावय येमा एक लाख प्रति पंप के मान ले अनुदान मदद दे जात हावय। हरेक साल उपलब्ध कराए गे अनुदान म ले रकम के बचत होए म छत्तीसगढ़ स्टेट पावर डिस्ट्रीब्यूशन कंपनी डहर ले प्रति पंप अधिकतम 1.50 लाख रूपिया लागत व्यय म विद्युत लाइन विस्तार के बुता भी स्वीकृत करे के बेवस्था हावय। येकर अलावा बस्तर अउ सरगुजा विकास प्राधिकरण, अनुसूचित जाति विकास प्राधिकरण अउ ग्रामीण विकास प्राधिकरण डहर ले भी अइसे सिंचाई पंप कनेक्शन, जेकर ऊर्जीकरण के खातिर राज्य शासन डहर ले करार अनुदान के सीमा ले जादा लागत व्यय म लाइन विस्तार के जरूरत होत हावय, येकर खातिर भी उपराहा अनुदान उपलब्ध कराये जात हावय।