सूरजपुर म कलेक्टर, एसपी, सीईओ गांव लगाइस जनसंवाद, सुनिस मांग अउ समस्या

अंजोर.सूरजपुर, 29 जुलाई। जिला कलेक्टर डॉ. गौरव कुमार सिंह, पुलिस अधीक्षक श्रीमती भावना गुप्ता, जिला पंचायत सीईओ राहुल देव सहित प्रशासनिक अउ पुलिस अमला आज गांव पंडोनगर म चौपाल लगाके गांव वाला ले गोठबात करके मांग अउ समस्या सुनिस। ए बखत ग्रामीण ह चिकित्सा, पेंशन, राशन कार्ड, सड़क, पानी, बिजली, तालाब, वन अधिकार पट्टा, सोलर पंप, सोलर स्ट्रीट लाइट, नवा पंचायत भवन, स्कूल भवन, समुदायिक भवन, पुलिया निर्माण, आंगनबाड़ी केंद्र सहित आन मांग अउ समस्या ल कलेक्टर ल बताइन। 

ये मउका म कलेक्टर ह गांव वाला के समस्या म तुरते कार्यवाही करत पेंशन, राशनकार्ड के लघियात निराकरण करिन अउ गांव वाला के मांग म गांव म बढि़या चिकित्सा सुविधा उपलब्ध कराये सीएमएचओ ल निर्देश दिस। ओमन सबो ग्रामीण ल आश्वस्त करिन के पूरा प्रशासन तुँहर द्वार पहुंचही अउ समस्या के निराकरण करे जाही। ओमन सबो अधिकारी मन ल गांव के भ्रमण करके समस्या के सर्वे करे खातिर निर्देशित तको करिन।

पुलिस अधीक्षक श्रीमती भावना गुप्ता ह ग्रामीण ले गोठबात करत कोनो भी रकम होए म हेल्पलाइन नंबर 7999161672 म कॉल या मैसेज करे ल किहिन जेकर निराकरण तुरते करे जाही। ओमन ग्रामीण ले गेलौली करत किहिन के पुलिस के मजबूत सूचना तंत्र आप लोगन हाव कोनो भी परेशानी होए म तुरते पुलिस विभाग के अवगत करावे। पुलिस अधीक्षक ह महिला मन के सुरक्षा अउ रक्षा के खातिर हिम्मत कार्यक्रम के जानकारी दीस अउ येमा महिला मन ल आत्मरक्षा के खातिर हिम्मत कार्यक्रम के माध्यम ले ट्रेनिंग दीस जाही। ओमन महिला मन के ए कार्यक्रम ले जुड़ने के खातिर कहिन। ए बखत पुलिस अधीक्षक ह निशुल्क पण्डो समुदाय के लोगन ल हेलमेट के वितरण करिन अउ हमेशा हेलमेट पहन के वाहन चलाये के खातिर प्रोत्साहित करिन।