अमेरिका म घलोक ’छत्तीसगढ़िया सबले बढ़िया’ के गूंज, भारत दिवस परेड म नाचा ह झांकी के माध्यम ले छत्तीसगढ़ के संस्कृति ले पहुंचइस सात समुंदर पार

अंजोर.रायपुर, 11 अगस्त। अमेरिका के शिकागो म इंडियन कम्युनिटी आउटरीच ICO  के तत्वावधान म आयोजित भारत दिवस परेड 2021 म नाचा NACHA-North America Chhattisgarh Association  ह छत्तीसगढ़ के प्रतिनिधित्व करत मिनी रायपुर के झांकी के माध्यम ले छत्तीसगढ़ के समृद्ध संस्कृति ल प्रदर्शित करिन। झांकी म राष्ट्रध्वज तिरंगा के संग ’छत्तीसगढ़िया सबले बढ़िया’ अउ ‘भारत माता के जय’ के गूंज ह सात समुंदर पार छत्तीसगढ़ ल जीवन्त बना दीस। मुख्यमंत्री श्री बघेल ह छत्तीसगढ़ ल संस्कृति के अंतर्राष्ट्रीय प्लेटफार्म दे खातिर नाचा ल धन्यवाद देत किहिन के छत्तीसगढ़ के झांकी अमेरिका म देख के मन गर्व ले भरगे। ओमन छत्तीसगढ़ के सांस्कृति ल अंतरराष्ट्रीय स्तर म ले के जाये के खातिर नाचा शिकागो चैप्टर के कार्यकारी सदस्य मन सुश्री दीपाली सरावगी, तिजेंद्र साहू, सोनू जोशी, सुश्री शशि साहू, सुश्री नमिता कैस्था, शंकर फतवानी, गीता खेतपाल, अभिजीत जोशी, गणेश कर जी मनला धन्यवाद दे हावय। 

झांकी म प्रतीक के रूप म बनाए गे घड़ी चौक अउ आये लव रायपुर थीम ह मानो छत्तीसगढ़ अउ शिकागो के दूरि ल मेटा दे रिहिस। नाचा के महिला सदस्य मन ह पारम्परिक वेशभूषा अउ छत्तीसगढ़िया गहना गला म कटली मोहर, कान म खुटी, हाथ अउ भुजा म नागमोरी बहुटा, पहुंची अउ कलाई म आईठी, चुरि, माथे म बिंदी लगाके छत्तीसगढ़ महतारी के प्रति अपन अपार श्रद्धा अउ प्रेम ल व्यक्त करत अपन संस्कृति ल सहेजे के सन्देश पूरा दुनिया ल देत रिहिस। 

ओमन छत्तीसगढ़ी लोकगीत मउंहा झरे रे मउंहा झरे रे..डोंगरी के तीर, लगे हे साल छींद, लाली परसा बन म फुल अउ लोक नृत्य करत छत्तीसगढ़ के लोक संस्कृति के छटा ले अमेरिका ल परिचय कराइन। जानबा होवय के शिकागो म भारतीय समुदाय डहर ले अपन अपन राज्य अउ संस्कृति ल बढ़ावा दे के खातिर ये कार्यक्रम आयोजित करे गिस जेमा अलग-अलग राज्य के झाकियां आकर्षण के केंद्र बिंदू रिहिस। भारत के 75 वां स्वतंत्रता दिवस के मउका म अमेरिका ले भारत के अमूल्य संस्कृति ल पूरा दुनिया तक पहुंचाये जात हावय। NACHA के कार्यकारी अध्यक्ष श्री गणेश कर ह बताइन के छत्तीसगढ़ के लोगन सात समुंदर पार रहत हावयं, फेर उंकर दिल अपन मातृभूमि के खातिर धड़कथे। रोड शो ल सफल बनाये के खातिर सबो सदस्य मन के मेहनत हावय। नाचा पाछु 4 साल ले उत्तरी अमेरिका म छत्तीसगढ़ के प्रतिनिधित्व करत हावय। इही कड़ी म भारतीय समुदाय डहर ले 75वा स्वतंत्रता दिवस के मउका म अगस्त के महीना भर राष्ट्रीय भक्ति ले ओतप्रोत इवेंट आयोजित करे जात हावयं।