राजनांदगांव ले अलग होके बने नवा जिला के नाम होही मोहला-मानपुर-चौकी

अंजोर.रायपुर, 16 अगस्त। राजनांदगांव जिला ले अलग होके बने नवा जिला मोहला-मानपुर-चौकी के नाम ले जाने जाही। मुख्यमंत्री दाऊ भूपेश बघेल ह आज राजनांदगांव जिला ले मुलाकात करे बर आए प्रतिनिधि-मंडल के गेलौली म ये घोषणा करिस। प्रतिनिधि-मंडल मुख्यमंत्री श्री बघेल के प्रति आभार जताइस आगू ओमन नगर पंचायत अंबागढ़ चौकी म सबो समाज अंबेडकर भवन अउ चौक-चौराहा के सुंदरता के खातिर हाई मास्ट लाइट लगाये के संबंध म भी ज्ञापन सउपिस, जेन म मुख्यमंत्री ह लघियात कार्यवाही करे के आश्वासन दीस।  

जानबा होवय के मुख्यमंत्री दाऊ भूपेश बघेल डहर ले 75वां स्वतंत्रता दिवस के मउका म राज्य म चार नवा जिला के गठन के घोसना करे हावय। प्रतिनिधिमंडल म जिला केंद्रीय सहकारी बैंक राजनांदगांव के अध्यक्ष नवाज खान, राजगामी संपदा राजनांदगांव के सदस्य रमेश खंडेलवाल, नगर पंचायत अंबागढ़ चौकी के अध्यक्ष श्रीमती विद्या रमेश ताम्रकार, उपाध्यक्ष रितेश मेश्राम, पार्षद अशोक वर्मा, विजय यादव, श्रीमती साधना सिंह, पूर्व पार्षद दामोदर शर्मा, अबदुल रफीक खान, नरेश शुक्ला सहित आन गणमान्य नागरिक सामिल रिहिस।