पोसन महीना एक सितम्बर ले, पोसन अउ सफाई जागरूकता खातिर होही केऊ कार्यक्रम

अंजोर.रायपुर, 27 अगस्त। कुपोषण अउ एनीमिया म कमी लाने के उद्देश्य ले प्रदेश म 1 ले 30 सितम्बर तक जन-आंदोलन के रूप म राष्ट्रीय पोषण महीना के आयोजन करे जाही। ए बखत जनसमुदाय म पोषण अउ स्वच्छता संबंधी जागरूकता अउ ओमा व्यवहार परिवर्तन के खातिर कई कार्यक्रम आयोजित करे  जाही।  

जानबा होवय के साल 2018 ले पूरा देश म पोषण अभियान के संचालन करे जात हावय। भारत सरकार के महिला अउ बाल विकास डहर ले आयोजित पोसन पखवाड़ा म राज्य सरकार सहित आने-आने डेव्हलेपमेंट संस्था मन डहर ले सक्रिय सहयोग करके गांव-गांव तक लोगन ल जागरूक करे जात हावय। इही कड़ी म प्रदेश म महिला बाल विकास विभाग ह पोषण पखवाड़ा के बखत जन-जागरूकता के खातिर दैनिक गतिविधी के कैलण्डर तइयार करे हावय। पोसन पखवाड़ा के बखत तीज, गणेश चतुर्थी तिहार मन के पोषण अउ स्वास्थ्य गतिविधी ले जोड़त होए गतिविधी आयोजित करे जाही। 

वृक्षारोपण, पोषण वाटिका निर्माण, योग सत्र के कई कार्यक्रम होही अउ नारा लेखन, निबंध, स्लोगन, रंगोली अउ व्यंजन प्रतियोगिता जइसे आने-आने प्रतियोगिता के आयोजन करे जाही। लोगन ल जचकी के पहिली जांच, गर्भावस्था अउ स्तनपान के बखत पोषण अउ एनीमिया म सलाह दे जाही। ए बखत गंभीर कुपोषित लइका के चिन्हांकन अउ प्रबंधन के खातिर अधिकारी मन के प्रशिक्षित करे जाही अउ पंचायत प्रतिनिधि मन के खातिर उन्नमुखीकरण कार्यक्रम होही। ए अभियान ले स्कूल ल जोड़त होए छात्र-छात्रा मनके खातिर कई गतिविधी आयोजित होही। पोषण व्यवहार म परिवर्तन के खातिर जादा ले जादा पुरूष ल अभियान ले जोड़े के कोशिश करे जाही, येकर खातिर स्थानीय स्तर म कई कार्यक्रम होही।