मनेन्द्रगढ़-चिरमिरी-भरतपुर के नाम ले जाने जाही नवा जिला ह, मुख्यमंत्री दाऊ भूपेश बघेल करिस घोसना, मनेन्द्रगढ़ वाला मन मुकुट पहिना के करिस मुखिया के अभिनंदन

• सक्ती वाला मन तको मुख्यमंत्री अउ विधानसभा अध्यक्ष के पोट्रेट अउ शाल भेंटकरके जताइस आभार

• राजीव गांधी ग्रामीण भूमिहीन कृषि मजदूर न्याय योजना के एक सितम्बर ले ऑनलाईन अउ ऑफलाईन फार्म भरे सुरू करे जाही 

अंजोर.रायपुर 21 अगस्त। मुख्यमंत्री दाऊ भूपेश बघेल ह किहिन हावय के नवा घोसित मनेन्द्रगढ़ जिला अब मनेन्द्रगढ़-चिरमिरी-भरतपुर के नाम ले जाने जाही। मुख्यमंत्री निवास म आयोजित कार्यक्रम म सक्ती अउ मनेन्द्रगढ़ जिला ले आए नागरिक ह मुख्यमंत्री श्री बघेल के नया जिला बनाए खातिर म उंकर आभार मानिस। मनेन्द्रगढ़वासी मनह मुख्यमंत्री ल मुकुट पहिनाके अभिनंदन करिन। कार्यक्रम म दुनों नव घोसित जिला ले आए नागरिक अउ आने-आने संगठन मन के प्रतिनिधि मन ह नवा जिला बनाए जाये म विधानसभा अध्य क्ष डॉ. चरण दास महंत के प्रति तको आभार व्यक्त करिन। 

मुख्यमंत्री ह मनेन्द्रगढ़वासी मनके मांग अउ उंकर भावना ल देखत नवा घोसित मनेन्द्रगढ़ जिला के नाम मनेन्द्रगढ़-चिरमिरी-भरतपुर करे जाये के घोसना करिस। ओमन किहिन के छत्तीसगढ़ भौगोलिक रूप ले देश के 9 वां बड़ा राज्य हावय, कई क्षेत्र म विरल आबादी हावय। 

मुख्यमंत्री दाऊ बघेल ह किहिन के गांव ल स्वावलंबी बनाके ही हम समृद्ध, सशक्त अउ खुशहाल छत्तीसगढ़ के कल्पना कर सकत हावन। राज्य सरकार किसान मन, गरीब मन अउ मजदूर मन के बेहतरी के खातिर बुता करत हावय। ओमन किहिन के मजदूर मन के खातिर शुरू करे जात राजीव गांधी ग्रामीण भूमिहीन कृषि मजदूर न्याय योजना के क्रियान्वयन जल्दीव शुरू हो जाही। ए योजना के खातिर पात्र लोगन ले एक सितंबर ले ऑनलाइन अउ ऑफ लाइन फार्म भरे के प्रक्रिया शुरू हो जाही। ग्रामीण क्षेत्र म निवास करइया कृषि मजदूर मन अउ पौनी पसारी ले जुड़े लोगन के ल योजना के लाभ मिलही। योजना म साल म 6 हजार रूपिया के आर्थिक मदद दे जाही।

विधानसभा अध्यक्ष डॉ. चरणदास महंत ह किहिन के सक्ती अउ मनेन्द्रगढ़ के नागरिक के कइ बरस जुन्ना सपना मुख्यमंत्री श्री बघेल ह पूरा करिन। मुख्यमंत्री ह अपन ढ़ाई साल के बुता म पांच जिला के सौगात दीस। डॉ. महंत ह किहिन के सक्ती क्षेत्र ले सबले जादा लोगन रोजगार के खातिर बाहिर जात हावयं, सक्ती ल नया जिला बनाए जाये ले न सिर्फ क्षेत्र के पूरा विकास होही, बल्कि स्थानीय लोगन ल बढि़या सुविधा अउ रोजगार के मउका मिलही। सक्ती अउ मनेन्द्रगढ़-चिरमिरी-भरतपुर के नागरिक भी अपन क्षेत्र म मिल जुलके विकास के एक नया वातावरण बनाही। कार्यक्रम के विधायक डॉ. विनय जायसवाल, विधायक अउ सरगुजा विकास प्राधिकरण के उपाध्यक्ष गुलाब कमरो ह तको सम्बोधित करिन।

ये मउका म संसदीय सचिव चंद्रदेव राय, विधायक अउ सरगुजा विकास प्राधिकरण के उपाध्यक्ष गुलाब कमरो, विधायक डॉ. विनय जायसवाल, छत्तीसगढ़ राज्य खनिज विकास निगम के अध्यक्ष गिरीश देवांगन, पूर्व विधायक गुरमुख सिंह होरा, पूर्व विधायक चुन्नी लाल साहू, नगर निगम चिरमिरी के महापौर श्रीमती कंचन जायसवाल, सभापति श्रीमती गायत्री विधा, नगर पालिका मनेन्द्रगढ़ के अध्यक्ष श्रीमती प्रभा पटेल, जिला पंचायत जांजगीर चांपा के अध्यक्ष श्रीमती यनिता यशवंत चंद्रा, उपाध्यक्ष राघवेन्द्र प्रताप सिंह सहित, सक्ती अउ मनेन्द्रगढ़ ले आए पंचायत प्रतिनिधि अउ बड़ संख्या म नागरिक उपस्थित रिहिस।