लेखक सतीश जायसवाल ल मिलही वसुंधरा सम्मान, स्व. श्री देवी प्रसाद चौबे के सुरता म मुख्यमंत्री दाऊ भूपेश बघेल करही सम्मानित

अंजोर.रायपुर, 13 अगस्त। मुख्यमंत्री दाऊ भूपेश बघेल ह अपन निवास कार्यालय म आयोजित समारोह म सुप्रसिद्ध लेखक सतीश जायसवाल ल 21वां वसुंधरा सम्मान ले सम्मानित करही। समारोह के आयोजन स्व. देवी प्रसाद चौबे के 45वीं पुण्यतिथि के मउका म लोक जागरण मासिक पत्रिका वसुंधरा डहर ले करे गे हावय। संस्कृति विभाग छत्तीसगढ़ शासन अउ श्री चतुर्भुज मेमोरियल फाउंडेशन के सहयोग ले आयोजित ए समारोह के अध्यक्षता संस्कृति मंत्री अमरजीत भगत करही। 

ये जानकारी देत वसुंधरा सम्मान के संयोजक विनोद मिश्र, आयोजन समिति के अध्यक्ष अरुण श्रीवास्तव, सचिव मुमताज ह बताइन के समारोह म स्व. देवीप्रसाद चौबे के पुत्र प्रदीप चौबे अउ कृषि अउ जल संसाधन मंत्री रविंद्र चौबे विशेष रुप ले उपस्थित रइही। साल 2001 ले सरलग जारी वसुंधरा सम्मान अब तक सर्वश्री रमेश नैयर, कुमार साहू, श्यामलाल चतुर्वेदी, बसंत कुमार तिवारी, बबन प्रसाद मिश्र, दिवाकर मुक्तिबोध, आशा शुक्ला, शरद कोठारी, गिरिजा शंकर, हिमांशु द्विवेदी, विनोद शंकर शुक्ल, ज्ञान अवस्थी, श्याम वेताल, अभय किशोर, गिरीश पंकज, सुशील त्रिवेदी, बी.के.एस.रे, प्रकाश दुबे, तुषार कांति बोस, ई.वी. मुरली ल दे जा चुके हावय।

समारोह म ‘लोक जागरण‘मासिक पत्रिका वसुंधरा के 58वां अउ कला, साहित्य, संस्कृति के मासिक पत्रिका बहुमत के 109 वां अंक के लोकार्पण भी करे जाही। वसुंधरा के ये अंक छत्तीसगढ़ के 11 कहानीकार मनके प्रतिनिधि कहानी म केंद्रित हावय।