भारत सरकार कोति ले छत्तीसगढ़ पुलिस के तीन अधिकारी ल मिलही मेडल, गृह मंत्री श्री ताम्रध्वज साहू अउ डीजीपी दीस बधाई

उपपुलिस अधीक्षक राजीव शर्मा, उपनिरीक्षक श्रीमती इंदिरा वैष्णव अउ सहायक उपनिरीक्षक श्रीमती इंदु शर्मा होही सम्मानित 

अंजोर.रायपुर, 12 अगस्त। भारत सरकार डहर ले छत्तीसगढ़ पुलिस के तीन अधिकारी मन ल बने विवेचना बर मेडल दे के घोषणा करे गे हावय। केंद्रीय गृह मंत्रालय डहर ले वर्ष-2021 के बर छत्तीसगढ़ पुलिस के बेमेतरा म पदस्थ उप पुलिस अधीक्षक राजीव शर्मा, राजनांदगांव म पदस्थ उपनिरीक्षक श्रीमती इंदिरा वैष्णव अउ बस्तर म पदस्थ सहायक उपनिरीक्षक श्रीमती इंदु शर्मा ल अलग-अलग प्रकरण म उत्कृष्ट विवेचना करे म पुरस्कृत करे जाही। जानबा होवय के भारत सरकार के केंद्रीय गृह मंत्रालय डहर ले हरेक साल बने विवेचना करे खातिर पुलिस अधिकारी मन ल मेडल दे जाथे। गृह मंत्री ताम्रध्वज साहू अउ पुलिस महानिदेशक डीएम अवस्थी ह ये तीनों अधिकारी मन ल मेडल मिले म बधाई दीस हावय। जानबा होवय के पुलिस मुख्यालय तनि ले बने विवेचना बर पुलिस अधिकारी मन के अनुशंसा केंद्रीय गृह मंत्रालय ल भेजे गे रिहिस।