गउठान म अब लहरावत हावय नेपियर घास, मिलही पशु मनला पौष्टिक चारा

अंजोर.रायपुर, 26 अगस्त। मुख्यमंत्री दाऊ भूपेश बघेल के पहल म गउठान म करे जात रोजगारमूलक बुता ले न केवल लोगन के रोजगार उपलब्ध होत हावय, बल्कि इहां बनत जैविक खाद ले हानिकारक रासायनिक खाद ले छुटकारा देवात हावय। गांव म बने गउठान म पशु मनला रखे के संग पौष्टिक चारा तको उपलब्ध कराये जात हावय। इहां म पशु मन के बने देखभाल भी करे जात हावय। 

बस्तर संभाग के सुकमा जिला म पशु मन के पौष्टिकता ले भरपूर हरा चारा उपलब्ध कराये के खातिर 80 गउठान म लगभग 241.50 एकड के क्षेत्र म चारागाह के निर्माण करके नेपियर घास लगाये गे हावय। जेन अब लहलहाये लगे हावयं। नेपियर घास लघियात बाढ़त हावय अउ काटे के बाद अऊ बाढ़थे। ये घास पशु मन के खातिर पौष्टिकता ले भरपूर होथे। आने वाला समय म नेपियर घास अउ नेपियर गांठ बेच के गउठान समिति, स्व-सहायता समूह आर्थिक लाभ तको कमाही। पशु चिकित्सा सेवा के उपसंचालक ह बताइन के नेपियर घास ल सालभर म 6 ले 8 बार कटाई करके हरा चारा ले जा सकत हावय। पोषक तत्व ले भरपूर हाईब्रिड नेपियर घास म कूड प्रोटीन 8-10 फीसदी, क्रुड रेशा 30 फीसदी अउ कैल्शियम 0.5 फीसदी मौजूद होथे। येकर अलावा 16-20 फीसदी शुष्क पदार्थ के अलावा एमे 60 फीसदी पाचन क्षमता अउ 3 फीसदी औक्सालेट ले भरपूर होथे।