अंजोर.रायपुर 12 अगस्त। महिला बाल विकास अउ समाज कल्याण मंत्री श्रीमती अनिला भेंड़िया ह छत्तीसगढ़ी जसगीत गायक दिलीप षडंगी के घर पहुंचिस। ओमन दिलीप षडंगी के कोरोना संक्रमण ले तीसरी लहर ले बचाव अउ जागरूकता के खातिर 28 जुलाई ले एक अगस्त तक पांच दिन के उपवास अउ 24 घंटा सरलग देवी उपासना के खातिर बधाई अउ शुभकामना दीस। मिले आरो के मुताबिक ए मउका म श्रीमती भेंड़िया ह कोरोना काल म दिक्कत के सामना करत 40 लोक कलाकार ल स्वेच्छानुदान मद ले पांच-पांच हजार रूपिया दे के घोषणा करिस। ओमन किहिन के ए सहयोग के रकम ले अवइया तिहार बार म लोक कलाकार के परिवार ल थोकिन मदद हो सकही।
जानबा होवय के संस्कृति विभाग म तको पाछू केऊ बछर ले आर्थिक सहयोग खातिर इहां के लोक कलाकार मन गेलौली करथे, फेर विभाग म कोनो सुनई नइये। कतकोन कलाकार गरीबी के दुबर दिन गुजारत हावय, कार्यक्रम मन तको कोरोना के सेती बंद हावय। दू बछर के कोरोना राई के बीच प्रदेश के संस्कृति विभाग हर कलाकार मनके मदद खातिर कोनो बड़का उदीम नइ करिस। अइसन म महिला बाल विकास अउ समाज कल्याण मंत्री श्रीमती अनिला भेंड़िया के 5-5 हजार के मदद के घोसना सहराये के लइक हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।