जगदलपुर आयुर्वेद अस्पताल म शहरी प्राथमिक स्वास्थ्य केन्द्र सुरू करिस उद्योग मंत्री, कुपोषण रोकथाम बर बने बुता करइया आंगनबाड़ी कार्यकर्ता मनके होइस सम्मान

अंजोर.जगदलपुर, 15 अगस्त। वाणिज्यकर, उद्योग अउ आबकारी मंत्री अउ बस्तर जिला के प्रभारी मंत्री कवासी लखमा ह जगदलपुर के शासकीय आयुर्वेद अस्पताल म शहरी प्राथमिक स्वास्थ्य केन्द्र के शुभारंभ करिन। ए मउका म मंत्री श्री लखमा ह अपन स्वास्थ्य परीक्षण भी कराइन। ओमन कुपोषण मुक्ति अभियान के अन्तर्गत उत्कृष्ट बुता कनइया आंगनबाड़ी कार्यकर्ता ल प्रशस्ति पत्र भेंट कर के सम्मानित भी करिन। जानबा होवय के कुम्हारपारा के शहरी प्राथमिक स्वास्थ्य केन्द्र के शुभारंभ होए ले आस-पास के सात वार्ड के निवासी मन ल उंकर घर के तिरे ही बने स्वास्थ्य सेवा के लाभ मिल सकही।

ये मउका म सांसद बस्तर दीपक बैज, विधायक चित्रकोट राजमन बेंजाम, महापौर श्रीमती सफीरा साहू, नगर निगम सभापति श्रीमती कविता साहू सहित संभाग आयुक्त जीआर चुरेन्द्र, जिला पंचायत सीईओ सुश्री ऋचा प्रकाश चौधरी, जिला आयुर्वेद अधिकारी डॉ. जीआर नेताम अउ शहरी स्वास्थ्य प्रबंधक पीडी बस्तिया अउ जनप्रतिनिधी मन के अलावा अधिकारी-कर्मचारीगण उपस्थित रिहिस।