अंजोर.सुकमा,12 अगस्त। उद्योग मंत्री कवासी लखमा ह सुकमा जिला म आज स्व. श्री कवासी हड़मा इंडोर स्टेडियम के लोकार्पण करिन। सबो सुविधा वाल इंडोर स्टेडियम के निर्माण 4 करोड़ 44 लाख 57 हजार रूपिया के लागत ले होए हावय। इन्डोर स्टेडियम म बैडमिंटन कोर्ट सहित आन सबो रकम के इंडोर खेल संबंधी बेवस्था करे गे हावय। इंडोर स्टेडियम बने ले स्थानीय खिलाड़ी मनला अभ्यास के संग ही अपन प्रतिभा ल निखारे के मउका मिलही।
मंत्री श्री लखमा ह जिला के युवा खिलाड़ी मनला सबो रकम के खेल म बढ-चढ़के हिस्सा ले अउ स्टेडियम के सुविधा के लाभ ले के खातिर प्रोत्साहित करिन। ओमन सुकमावासी मनला बधाई देत किहिन के लंबा बखत ले जिला के मांग ल पूरा करे के खातिर राज्य शासन कृत संकल्पित हावय। कोनो भी क्षेत्र के विकास के खातिर जरूरी हावय के आम लोगन के जरूरत ल पूरा करे जाए। जिला म प्रतिभावान खिलाड़ी मनके कमी नइ हावय, फेर खेल के अभ्यास के खातिर जरूरी मूलभूत सुविधा ले युक्त स्टेडियम के होना जरूरी हावय ताकि स्थानीय खिलाड़ी अपन खेल ल बढि़या ढंग ले निखार सकय। स्टेडियम के बन जाये ले स्थानीय खेल प्रतिभा अउ भी बढि़या तरीका ले आगू आही अउ खिलाड़ी राष्ट्रीय स्तर के स्पर्धा के खातिर अपन ल तइयार कर सकही।
उद्घाटन मउका म मंत्री श्री लखमा ह बैडमिंटन कोर्ट म हाथ भी अजमाइस, उंकर संग जिला पंचायत अध्यक्ष हरीश कवासी, कलेक्टर विनीत नन्दनवार अउ पुलिस अधीक्षक सुनील शर्मा ह बैडमिंटन खेलके युवा मन ल प्रेरित करिन।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।