मेजर ध्यानचंद जयंती के मउका म नारायणपुर मुख्यालय म मनाये गिस खेल दिवस

अंजोर.नारायणपुर 30 अगस्त। राष्ट्रीय खेल दिवस के मउका म नारायणपुर जिला म पाछु दिन आने-आने कार्यक्रम के आयोजन करे गिस। मुख्य कार्यक्रम जिला मुख्यालय के तिर म स्थित आडिटोरियम म आयोजित करे गिस। कार्यक्रम के मुख्य अतिथि जिला पंचायत अध्यक्ष श्रीमती श्यामबती नेताम अउ अध्यक्षता नगर पालिका अध्यक्ष श्रीमती सुनीता मांझी ह करिस। कार्यक्रम के शुरूआत अतिथि मन डहर ले मेजर ध्यानचंद के चित्र म दीप प्रज्जवलित ले होइस। श्रीमती नेताम ह छात्र-छात्रा ल खेल के प्रति उत्साहित करत खेल ल जीवन के अभिन्न अंग बतात प्रेरित करिन। ओमन किहिन के जीवन म जतका महत्व पढ़ाई के हावय, ओतके ही महत्व खेल के भी हावय। ए मउका म अतिथि ह उपस्थित खेल प्रेमि ल खेल दिवस की बधाई दीस।

राष्ट्रीय खेल दिन के मउका म जिला मुख्यालय के बालक उच्चतर माध्यमिक विद्यालय म चित्रकला प्रतियोगिता के आयोजन करिन। जेमा लगभग 75 बालक-बालिका ह करार आयुवर्ग म हिस्सा लेके अपन कला के प्रदर्शित करिन। सीनियर वर्ग म अनुभूति सिंह ठाकुर ह पहिली ठऊर पइस। उहें जूनियर वर्ग म डिंकी कुमेटी पहिली ठऊर म रहिस। खेल प्रेमि ह गीत-संगीत के माध्यम ले अपन कला के प्रदर्शन करिन। ए मउका म अधिवक्ता शिवकुमार पाण्डेय ह गोण्डी, हल्बी म गीत के प्रदर्शन करके दर्शक के मनमोह लिस।