1 सितंबर ले सुरू होही राजीव गांधी ग्रामीण भूमिहीन कृषि मजदूर न्याय योजना, ऑनलाइन होही पंजीयन, मिलही सालाना 6000 रुपिया के सहायता

अंजोर.महासमुन्द, 30 अगस्त। छत्तीसगढ़ राज्य म ‘राजीव गांधी ग्रामीण भूमिहीन कृषि मजदूर न्याय योजना’ वित्तीय साल 2021-2022 सुरू करे जात हावय। ए योजना के मुख्य उद्देश्य ग्रामीण क्षेत्र म भूमिहीन कृषि मजदूर परिवार के पहचान करके अउ भूमिहीन कृषि परिवार ल वार्षिक आधार म आर्थिक अनुदान उपलब्ध कराना हावय। सबोच परिवार के सालाना 6000 रूपिया के आर्थिक मदद दे जाही। सितम्बर महीना के पहिली तारीख़ ले ए योजना के सुरू होही। येकर खातिर ज़िले म सबो तैयारी आखरी दौर म हावय। जनपद पंचायत डहर ले आवेदन पत्र के छपाई करवाये गे हावय। ज़िला के पाँच विकासखंडों म लगभग 63000 आवेदक राजीव गांधी ग्रामीण भूमिहीन कृषि मजदूर न्याय योजना’ म संभावित हावय। 

योजनांतर्गत हितग्राही परिवार के पंजीयन के काम अवइया 1 सितम्बर 2021 ले 30 नवम्बर 2021 तक करे जाही। कलेक्टर ह ज़िला के सबो गांव पंचायत मन म कार्यालयीन समय म आवेदन ले अउ पोर्टल म एंट्री करे बर कर्मचारी मन के ड्यूटी लगाये के निर्देश दे हावय ।

ये योजना म ग्रामीण भूमिहीन कृषि मजदूर परिवार के ले चरवाहा, बढ़ई, लोहार, मोची, नाई, धोबी, पुरोहित जइसे- पौनी-पसारी बेवस्था ले जुड़े परिवार, वनोपज संग्राहक अउ शासन डहर ले समय-समय म नियत आन वर्ग भी पात्र होही, यदि वो परिवार के पास कृषि भूमि नइ हावय। आवासीय प्रयोजन बर धारित भूमि, कृषि भूमि नइ मानी जाही।

ग्रामीण भूमिहीन कृषि मजदूर परिवार के मुखिया ल अनुदान मदद रकम पाये बर आवेदन के संग राजीव गांधी ग्रामीण भूमिहीन कृषि मजदूर न्याय योजना पोर्टल म पंजीयन कराना अनिवार्य होही। योजनांतर्गत लाभ पाये बर इच्छुक ग्रामीण भूमिहीन कृषि मजदूर परिवार के मुखिया के करार समयवधि म राजीव गांधी ग्रामीण भूमिहीन कृषि मजदूर न्याय योजना के पोर्टल Rggbkmny.cg.nic.in म पंजीयन कराना अनिवार्य होही। पंजीयन बर जरूरी दस्तावेज म आधार कार्ड, बैंक पासबुक के छाया प्रति के संग आवेदन सचिव, गांव पंचायत के समक्ष प्रस्तुत करना होही।