गड़बड़ी करइया खातु बेचइया ऊपर बड़का कार्रवाई, डभरा म एक अउ सक्ती एक फर्म के तीन गोदाम सील

अंजोर.सक्ती, 26 अगस्त। राज्य म किसान मन ल करार कीमत म बने रासायनिक खातु दे खातिर जिला म निजी उर्वरक विक्रेता फर्म के जांच-पड़ताल के अभियान सरलग जारी हावय। निजी फर्म के निरीक्षण के बखत अधिकारी मन के टीम डहर ले रासायनिक उर्वरक के दर के प्रदर्शन, स्टाक, कैश मेमो, क्रेडिट मेमो के जांच के संग ही उर्वरक के गुणवत्ता के परीक्षण के खातिर सेम्पल भी ले जात  हावयं। उर्वरक बेचे के दर, स्टाक म गड़बड़ी अउ आन अनियमितता के मामला पकड़ म आये म संबंधित फर्म मनके विरूद्ध उर्वरक गुण रोकथाम आदेश वितरण कार्यवाही करे जाये के संग ही सेम्पल के अमानक पाए जाये म संबंधित लॉट ल बेचे म भी प्रतिबंधित करे जात हावय।

इही कड़ी म आज जांजगीर-चांपा जिला के डभरा म एसडीएम के नेतृत्व म कृषि विभाग के अधिकारी मन के टीम ह निजी खातु विक्रेता मेसर्स मदनलाल अग्रवाल खातु भंडार के औचक निरीक्षण करिन। निरीक्षण के बखत करार कीमत ले जादा कीमत म खातु बेचे के मामला पकड़ म आने म उर्वरक गुण रोकथाम आदेश 1985 के धारा 3(3) के तहत संबंधित फर्म के खातु भंडार के सील करके दे गे हावय। जानबा होवय के जांजगीर-चांपा जिला के सक्ती म बीते दिन म एक निजी खातु विक्रेता म मेसर्स ज्ञानीराम चंदगीराम के तीन खातु गोदाम के अनियमितता के चलते सील करे के संग ही उंकर उर्वरक पंजीयन प्रमाण पत्र ल निलंबित करे  जाये की कार्यवाही करे गिस रिहिस। मेसर्स ज्ञानीराम चंदगीराम उर्वरक विक्रेता के इहां निरीक्षण के बखत करार कीमत ले जादा कीमत म उर्वरक के विक्रय, किसान मन के कैश मेमो, क्रेडिट मेमो जारी नी करे, स्टाक म गड़बड़ी के मामला पकड़ म आने म फर्म के खातु गोदाम ल सील करके दे गिस।