अंजोर.रायपुर, 04 सितम्बर। मुख्यमंत्री दाऊ भूपेश बघेल के मुख्य आतिथ्य म शिक्षक दिवस के मउका म 5 सितम्बर के नवाचारी शिक्षक मन के बुता म आधारित प्रदर्शनी ‘शिक्षा मड़ई‘ के आयोजन करे जाही। ये आयोजन मंझनिया 01 बजे आर.डी. तिवारी स्वामी आत्मानंद शासकीय उत्कृष्ट अंग्रेजी माध्यम स्कूल आमापारा रायपुर म होही। मुख्यमंत्री श्री बघेल ए मउका म स्कूल के लोकार्पण करही। कार्यक्रम म नवाचारी शिक्षक मन के सम्मान, महतारी दुलार योजना के लइका के छात्रवृत्ति के वितरण भी करे जाही।
कार्यक्रम के अध्यक्षता स्कूल शिक्षा मंत्री डॉ. प्रेमसाय सिंह टेकाम करही। कार्यक्रम म कृषि मंत्री रविन्द्र चौबे, नगरीय प्रशासन मंत्री डॉ. शिवकुमार डहरिया, संसदीय सचिव विकास उपाध्याय अउ महापौर रायपुर एजाज ढेबर विशिष्ट अतिथि के रूप म सामिल होही। कार्यक्रम म राज्य के चुनिंदा नवाचारी शिक्षक भी सामिल होही।
शिक्षा मड़ई कार्यक्रम म मुख्यमंत्री अउ अतिथि डहर ले स्कूल के लोकार्पण करे जाही। येकर बाद मोहल्ला कक्षा अउ लाउडस्पीकर कक्षा, मोटर-साइकिल गुरूजी क्लास, सिनेमा वाला गुरूजी क्लास, श्यामपट वाला गुरूजी क्लास, अंगना म शिक्षा, स्मार्ट क्लास अउ जुगाड़ स्टूडियो, पपेट शो, विज्ञान-रसायन-भौतिक प्रयोगशाला के अवलोकन करे जाही। येकर संग ही टीएलएम (टीचर लर्निंग मटेरियल) प्रदर्शनी, पुस्तकालय, अमाराईट प्रोजेक्ट, लइका डहर ले खेले के आने-आने स्थानीय खेल के अवलोकन भी करही।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।