उद्योग अउ बाजार के मांग के मुताबिक युवा मन ल रोजगार के खातिर तइयार करे जाए : श्री भूपेश बघेल

अंजोर.रायपुर, 23 जनवरी। छत्तीसगढ़ रोजगार मिशन के पहिली बइठक म मुख्यमंत्री भूपेश बघेल ह किहिन हावय के उद्योग अउ बाजार के मांग के मुताबिक युवा मन ल रोजगार के खातिर तइयार करे जाए, ओला प्रशिक्षण देके आने-आने ट्रेड म दक्ष बनाये जाए। ओमन किहिन के ग्रामीण क्षेत्र म स्थापित रूरल इंडस्ट्रियल पार्क म बाजार के मांग के मुताबिक उत्पादन करे जाए। ये जिनिस के गुणवत्ता बढ़ाये अउ सर्टिफिकेशन के खातिर छत्तीसगढ़ म स्थित उच्च तकनीकी संस्थान के सहयोग ले जाए। ओमन किहिन के नवा स्टार्टअप के खातिर बढि़या इको-सिस्टम तइयार करे जाए, जेकर ले युवा मन ल रोजगार के बढि़या मउका मिल सके।

मुख्यमंत्री के अध्यक्षता म उंकर निवास कार्यालय म आयोजित बइठक म रोजगार मिशन के स्वरूप, कार्यप्रणाली के संबंध म विस्तार ले विचार-विमर्श करिन। ओमन रोजगार के नवा मउका के सिरजन के दिशा म तेजी ले काम करे अउ सरलग रूप ले रोजगार मिशन के बुता के समीक्षा के निर्देश दिस। 

मुख्यमंत्री ह नेताजी सुभाषचंद्र बोस के जयंती के मउका म वीडियो कॉन्फ्रेंसिंग के माध्यम ले छत्तीसगढ़ रोजगार मिशन के राज्य स्तरीय कार्यालय के राजधानी रायपुर म शुभारंभ करिन। कार्यक्रम के शुरुआत म मुख्यमंत्री श्री बघेल ह नेताजी सुभाषचंद्र बोस के चित्र म पुष्प अर्पित करके ओला नमन करिन। 

मुख्यमंत्री ह आई.आई.टी., आई.आई.एम., ट्रिपल आई.आई.टी. अउ एन.आई.टी. के डायरेक्टर ले तको रोजगार सिरजन के संबंध म सुझाव लिस। ओमन किहिन के छत्तीसगढ़ के ग्रामीण क्षेत्र के जिनिस के सर्टिफिकेशन अउ मानकीकरण के खातिर उच्च शैक्षणिक संस्थान आगू आए। ओमन ये संस्थान ले नवा स्टार्टअप के संग ही देश की प्रतिष्ठित कम्पनी के छत्तीसगढ़ लाने म सहयोग के गेलौली करिन। ये कम्पनी के आए ले छत्तीसगढ़ के उच्च शिक्षित युवा मन के खातिर राज्य म ही अच्छा मउका बनही।