मुख्यमंत्री के मिलेट मिशन : कोदो, कुटकी अउ रागी के समर्थन कीमत म खरीदी जबर

अंजोर.रायपुर, 22 जनवरी। छत्तीसगढ़ ल देश के मिलेट हब बनाये के खातिर सुरू करे  गे मिलेट मिशन के तहत कोदो, कुटकी अउ रागी के फसल मन ल प्रोत्साहित करे जात हावय। ये फसल मन के समर्थन कीमत म खरीदी के संग ही राजीव गांधी किसान न्याय योजना म किसान मन ल ये फसल मन के इनपुट सब्सिडी दे के फइसला तको ले गे हावय। 

मुख्यमंत्री भूपेश बघेल के पहल म कोदो, कुटकी अउ रागी के फसल लेवइया किसान मन ल येकर बिक्री म कोनो रकम के दिक्कत नइ हो, येकर खातिर राज्य के सबो प्राथमिक वनोपज सहकारी समिति मन म समर्थन कीमत म खरीदी करे जात हावय। प्रदेश म अब तक सवा करोड़ रूपिया ले जादा कीमत के 4110 क्विंटल कोदो, कुटकी अउ रागी के खरीदी करे गे हावय।

अधिकारी मन ह बताइन के जगदलपुर, दंतेवाड़ा, दक्षिण कोण्डागांव, नारायणपुर, पश्चिम भानुप्रतापपुर, बलरामपुर, मरवाही, सुकमा अउ सूरजपुर वनमण्डल म 252.02 क्विंटल कुटकी (काली), वनमण्डल केशकाल, जशपुर, दंतेवाड़ा, दक्षिण कोण्डागांव, नारायणपुर,  बलरामपुर, मनेन्द्रगढ़, राजनांदगांव, सरगुजा अउ सूरजपुर वनमण्डल म 665.69 क्विंटल कुटकी (भूरा), कटघोरा, कवर्धा, कांकेर, केशकाल, कोरिया, जगदलपुर, दंतेवाड़ा, दक्षिण कोण्डागांव, पश्चिम भानुप्रतापुर, बलरामपुर, बिलासपुर, मनेन्द्रगढ़, मरवाही, राजनांदगांव, रायगढ़, सुकमा अउ सूरजपुर वनमण्डल म 2743.06 क्विंटल कोदो, कांकेर, केशकाल, जगदलपुर, जशपुर, दंतेवाड़ा, दक्षिण कोण्डागांव, धमतरी, बलरामपुर, सुकमा अउ सूरजपुर वनमण्डल म 458.58 क्विंटल रागी के खरीदी करे गे हावय।