राज्य म मिशन के रूप म संचालित गोधन न्याय योजना : मुख्यमंत्री भूपेश बघेल

अंजोर.रायपुर, 22 जनवरी। मुख्यमंत्री दाऊ भूपेश बघेल ह किहिन के छत्तीसगढ़ सरकार के गोधन न्याय योजना ल पूरा देश म एक आदर्श योजना के रूप म स्वीकार करे हावय। ए बार गणतंत्र दिवस के मउका म नवा दिल्ली के राजपथ म गोधन न्याय योजना के झांकी देश-दुनिया ल लोगन देखही। 

मुख्यमंत्री ह किहिन के ए योजना ल छत्तीसगढ़ राज्य म मिशन के रूप म संचालित करे जा हावय। गांव म स्थापित गउठान म आजीविका के साधन ल बढ़ाये के उद्देश्य ले इहां रूरल इंडस्ट्रियल पार्क तेजी ले विकसित करे  जात हावय। गउठान म अब तेल मिल अउ दाल मिल स्थापित करे  जाये के काम सुरू कर दे गे हावय। पहिली चरण म राज्य के 148 गउठान म तेल मिल अउ 188 गउठान म दाल मिल के स्थापना करे जात हावय। येकर ले गउठान म  आय मूलक गतिविधी ल बढ़ावा मिलही।

कार्यक्रम के सुरू म कृषि उत्पादन आयुक्त डॉ. कमलप्रीत सिंह ह गोधन न्याय योजना के प्रगति के बारे म विस्तार ले जानकारी दीस। ओमन बताइन के राज्य म अब तक 10591 गउठान स्वीकृत करे  गे हावय, जेमा ले 7,933 पूरा रूप ले संचालित हावय। गोधन न्याय योजना के तहत गउठान म अब तक 61.07 लाख क्विंटल गोबर के खरीदी करे जा चुके हावय। ओमन गउठान म वर्मी कम्पोस्ट के उत्पादन, बेचे अउ आन आय मूलक गतिविधी के बारे म जानकारी दीस।