जिला रोजगार केन्द्र रायपुर म मारूति सुजुकी इण्डिया लिमिटेड प्लेसमेंट कैम्प

अंजोर.रायपुर 21 जनवरी। जिला रोजगार अउ स्वरोजगार मार्गदर्शन केन्द्र, रायपुर डहर ले टेक्नोसिम ट्रेनिंग सर्विसेस (मारूति सुजुकी इण्डिया लिमिटेड) के खातिर ऑनलाईन प्लेसमेंट कैम्प के आयोजन प्रतिमाह के 11 तारीख ले 30 तारीख तक के करे जात हावय। अइसे स्थानीय शिक्षित युवा पुरूष आवेदक जेकर उमर 18 ले 20 साल के मध्य हो, जेन मन कक्षा 10वीं के परीक्षा न्यूनतम 50 परतिसत अंक के संग पास करे हो उंकर खातिर मारूति सुजुकी मोटर्स इण्डिया लिमिटेड के गुजरात अउ गुरगांव (हरियाणा) प्लांट म 2 साल के सर्टिफिकेट कोर्स करत नौकरी पाये के सुनहरा मउका हो सकत हावय।

उप संचालक रोजगार ह बताइन के येकर खातिर आवेदक के 13028 रूपिया प्रतिमाह के मानदेय, रकम 50 हजार रूपिया के मेडिकल अउ 12 लाख रूपिया के एक्सीडेंट इंश्योरेंस के संग बिहनिया के नास्ता अउ मंझनिया के भोजन कंपनी कोति ले फोकट म दे जाही। एमे चयनित आवेदक के 100 प्रतिशत् उपस्थिति म 800 रूपिया प्रतिमाह के अटेंडेंट बोनस, प्रति सेमेस्टर 03 अवकाश ले कम होए म 2400 रूपिया अउ कोर्स समापन म 24 अवकाश ले कम होए म 7200 रूपिया के अतिरिक्त सेमेस्टर बोनस तको दे जाही। सफलतापूर्वक कोर्स पूरा करइया आवेदक ल मारूति सुजुकी कंपनी म सरलग नियुक्ति दीस जाही। सबोच महीना के 01 तारीख ले 10 तारीख के मध्य बैच सुरू करे जाना हावय।