जनता ले जुड़के प्रतिबद्धता ले बुता करे म बढ़ही पहचानः गृहमंत्री ताम्रध्वज साहू

अंजोर.रायपुर 17 जनवरी। गृहमंत्री ताम्रध्वज साहू ले छत्तीसगढ़ के प्रशिक्षु आईपीएस अधिकारी मन ह उंकर निवास कार्यालय म सौजन्य मुलाकात करिस। ए बखत गृह मंत्री श्री साहू ह किहिन के पुलिस के सेवा आम नागरिक ले जुड़े बहुत ही जरूरी सेवा हावय। अपन कर्तव्य अउ दायित्व के निर्वहन ईमानदारी पूर्वक करके आमजनमानस म एक अलग पहचान बनाये जा सकत हावय। ओमन सबो परिवीक्षाधीन अधिकारी मन ल बधाई अउ सुभकामना दीस अउ उंकर ले गृह राज्य, शैक्षणिक पृष्ठभूमि के संबंध म जानकारी लिस। मंत्री ह आईपीएस अधिकारी मन ले किहिन के आमजनता के समस्या के समाधान करे के संग बढि़या पुलिसिंग ले तको शासन के प्रति सकारात्मक माहौल बनथे। ओमन प्रशिक्षण के बखत वरिष्ठ अधिकारी मन ले मिले मार्गदर्शन के उपयोग करे अउ फील्ड म जाके बढि़या सेवा उपलब्ध कराये।