राज्यपाल सुश्री अनुसुईया उइके ह रायगढ़ के मसाला फसल के प्रदर्शनी के करिस सराहना

अंजोर.रायगढ़, 5 जनवरी। इंदिरा गाँधी कृषि विश्वविद्यालय, रायुपर म 01 जनवरी 2022 के राष्ट्रीय शिक्षा नीति के अनुरुप छत्तीसगढ़ कृषि शिक्षा प्रणाली म आयोजित एक दिवसीय कार्यशाला के उद्घाटन छत्तीसगढ़ के राज्यपाल अउ कुलाधिपति सुश्री अनुसुईया उइके ह करिन। कार्यशाला म विश्वविद्यालय के ले संचालित आने-आने इकाई डहर ले प्रदर्शनी के आयोजन भी करे गे रिहिस।

राज्यपाल अउ कुलाधिपति राज्यपाल सुश्री अनुसुईया उइके ह अखिल भारतीय समन्वित मसाला अनुसंधान परियोजना, कृषि महविद्यालय अउ अनुसंधान केन्द्र, रायगढ़ के प्रदर्शनी म धनिया के प्रजाति, हल्दी के प्रजाति अउ जैव विविधता अउ आन मसाला फसल मन के प्रजाति के अवलोकन करके केन्द्र के सराहना करिस अउ भविष्य म इही रकम ले अनुसंधान बुता के जारी रखत मसाला फसल मन के प्रजाति म उत्तरोत्तर बड़वार करके किसान मनके हित म बुता करे के सुझाव दीस।