कृषि विश्वविद्यालय के नवा कुलपति डॉ. चंदेल पदभार ग्रहण करके कृषि मंत्री रविंद्र चौबे ले करिन मुलाकात

Agricultural University Dr. Chandel

अंजोर.रायपुर, 25 फरवरी। इंदिरा गांधी कृषि विश्वविद्यालय के नवा कुलपति डॉ. गिरीश चंदेल ह पदभार ग्रहण कर लिस। निवृतमान कुलपति डॉ. एस.एस. सेंगर ह डॉ. चंदेल ल कार्यभार सउपिस। डॉ. चंदेल डहर ले पदभार ग्रहण करे के मउका म विश्वविद्यालय के कुलसचिव जी.के. निर्माम, संचालक अनुसंधान सेवा डॉ. पी.एल. चन्द्राकर, निदेशक विस्तार डॉ. आर.के. बाजपेयी, अधिष्ठाता पढ़ईया कल्याण डॉ. जी.के. श्रीवास्तव, सह संचालक अनुसंधान डॉ. विवेक त्रिपाठी सहित विश्वविद्यालय प्रशासन के वरिष्ठ अधिकारी उपस्थित रिहिस।

कुलपति डॉ. गिरीश चंदेल के परिचय 

डॉ. गिरीश चंदेल, देश के प्रख्यात पौधा प्रजनक अउ जैव प्रौद्योगिकी वैज्ञानिक हावयं। छत्तीसगढ़ के सिमगा, हथबंद के ग्राम-कुकरा चुन्दा के मूल निवासी डॉ. चंदेल के कृषि शिक्षा, अनुसंधान अउ विस्तार प्रबंधन के 30 साल के अनुभव हावय, जेमा 07 साल के अनुभव बिसेस रूप ले सूखा अउ पोषण अनुसंधान के खातिर अत्याधुनिक स्टेट ऑफ आर्ट बुनियादी सुविधा के बनाये अउ पोषण प्रबंधन म रिहिन हावय। डॉ. चंदेल ह धान के पांच बायोफोर्टिफाईड फसल प्रजाति- सी.जी. जिंक राइस, सी.जी. जिंक राए -2, जिंको राए एम.एस. (जिंक की जादा मात्रा वाला प्रजाति)  प्रोटेजिन (प्रोटीन के जादा मात्रा वाला प्रजाति) अउ सी.जी. मधुराज-55 (कम शर्करा वाला प्रजाति) विकसित केर हावयं। कृषि विश्वविद्यालय के जर्मप्लाज्म बैक म संग्रहित धान के 24 हजार प्रजाति के डी.एन.ए. फिंगर प्रिंटिंग बुता म तको डॉ. चंदेल के योगदान रिहिन हावय।

कृषि मंत्री रविंद्र चौबे ले कृषि विश्वविद्यालय के कुलपति डॉ.चंदेल के मुलाकात

कृषि अउ जल संसाधन मंत्री रविंद्र चौबे ले आज इहां मंझनिया उंकर निवास कार्यालय म इंदिरा गांधी कृषि विश्वविद्यालय के नवनियुक्त कुलपति डॉ. गिरीश चंदेल ह सौजन्य मुलाकात करिस। कृषि मंत्री रविंद्र चौबे ह डॉक्टर चंदेल ल उंकर नवा पद अउ दायित्व के खातिर बधाई अउ सुभकामना दीस।