मुख्यमंत्री ह बिलासपुर म तिफरा फलाईओवर ब्रिज अउ व्यापार विहार स्मार्ट रोड के करही लोकार्पण

अंजोर.रायपुर, 24 फरवरी। मुख्यमंत्री भूपेश बघेल ह बिलासपुर शहरवासी ल तिफरा फलाईओवर ब्रिज, व्यापार विहार स्मार्ट रोड के दू बड़े सौगात दिही। फलाई ओवर अउ स्मार्ट सड़क के शुरु होए ले बिलासपुर-रायपुर रद्दा अउ बिलासपुर संभाग के सबले बड़े व्यापारिक केंद्र व्यापार विहार म यातायात व्यवस्थित अउ सुगम हो सकही। मुख्यमंत्री येकर संग ही मनोरंजन अउ ज्ञान के केन्द्र के रूप म प्लेनेटोरियम के तको सौगात दिही।

बिलासपुर-रायपुर रद्दा म काफी लंबा समय ले तिफरा रेलवे क्रासिंग म व्यवस्थित अउ चौड़ा फ्लाईओवर ब्रिज के ज़रूरत महसूस करे जात रिहिस। तिफरा छोर ले स्वर्गीय जमुना प्रसाद वर्मा कॉलेज तक 1620 मीटर के लंबाई म तिफरा फ्लाई ओवर ब्रिज ल बनाये म 107 करोड़ 49 लाख रूपिया के लागत नगरीय प्रशासन अउ विकास विभाग डहर ले लगाये गे हावय।

ए रेलवे क्रासिंग म पहिली तको एक ओवर ब्रिज ल बनाये रिहिस, फेर ब्रिज के आगू ही चौक होए अउ ब्रिज के चौड़ाई कम होए के सेती चौक के चारों तनि अउ ब्रिज म आए दिन जाम के सामना करना पड़त रिहिस। अब ए नवा  फ्लाई ओवर ब्रिज के बन जाये ले महाराणा प्रताप चौक अउ तिफरा छोर म जाम ले मुक्ति मिल जाही। संग ही रायपुर रद्दा के बिलासपुर शहर ले जोड़ने वाला ए ब्रिज ले शहरवासी के संग ही संग उन तमाम राहगीर ल तको राहत मिलही, जेन एनएच 130 के उपयोग आवागमन के खातिर करत हावयं।

व्यापार विहार स्मार्ट रोड के होही लोकार्पण

बिलासापुर शहर म महाराणा प्रताप चौक ले तारबाहर चौक तक बिलासपुर स्मार्ट सिटी लिमिटेड डहर ले लगभग 26 करोड़ 83 लाख रूपिया के लागत ले व्यवस्थित अउ आधुनिक सुविधा ले सुसज्जित स्मार्ट रोड के बनाये गे हावय। संभाग के सबले बड़े व्यापारिक केंद्र होए के सेती ले ए रद्दा म भारी गाड़ी के आवागमन हमेशा लगे रहय फेर पहिली म ए रद्दा के अव्यवस्थित होए के सेती ले हमेशा ट्रैफिक अउ जाम के समस्या बने रिथे। फोरलेन स्मार्ट रोड के बन जाये ले व्यापार विहार म व्यापारिक परिवहन सहज अउ सुगम होही।  

मनोरंजन अउ ज्ञान के केन्द्र प्लेनेटोरियम के मिलही सौगात

बिलासपुर स्मार्ट सिटी लिमिटेड डहर ले साढ़े तीन एकड़ म 6 करोड़ 77 लाख रूपिया के लागत ले डॉ.एपीजे अब्दुल कलाम प्लेनेटोरियम के बनाये करे गे हावय। मुख्यमंत्री भूपेश बघेल 25 फरवरी के येकर लोकार्पण करही। ए प्लेनेटोरियम म शहरवासी ल दिन म ही आकाशीय नज़ारा के अवलोकन के संग ही विज्ञान अउ खगोलशास्त्र के बारे म जरूरी जानकारी मिलही। दू सौ लोगन के बइठक क्षमता वाला ए प्लेनेटोरियम म आगंतुक के खातिर फोर के सिंगल टेक्नोलॉजी के प्रोजेक्टर लगाये गे हावय, येकर अलावा प्लेनेटोरियम परिसर म ऑक्सीजोन के तको बनाये गे हावय। प्लेनेटोरियम पहुंचे वाला आगंतु के सुविधा के धियान म रखत होए बिलासपुर स्मार्ट सिटी लिमिटेड डहर ले पहुंच रद्दा के तको बनाये गे हावय।