नवा शिक्षा नीति युवा मन के जीवन म अउ शिक्षण के तरीक म व्यापक बदलाव लाही : राज्यपाल सुश्री उइके

अंजोर.रायपुर, 01 फरवरी। राज्यपाल सुश्री अनुसुईया उइके छत्तीसगढ़ निजी विश्वविद्यालय विनियामक आयोग के स्थापना दिवस समारोह म वर्चुअल रूप ले सामिल होइस। ओमन आयोग के 17 साल सफलतापूर्वक पूरा करे के खातिर बधाई दीस अउ किहिन के आयोग डहर ले निजी विश्वविद्यालय म शिक्षा के गुणवत्ता अउ विश्वसनीयता बनाये रखे के खातिर सराहनीय प्रयास करे  गे। 

ओमन प्रधानमंत्री डहर ले युवा मन के भविष्य ल संवारने के खातिर लागू करे गे नवा शिक्षा नीति-2020 निजी विश्वविद्यालय म लघियात ही लागू करे के गेलौली करिन, जेकर ले युवा मन के समग्र रूप ले विकास हो सके। सुश्री उइके ह किहिन के नवा शिक्षा नीति-2020 छत्तीसगढ़ म तको अगले सत्र ले लागू करे जाही। ये नीति युवा मन के जीवन म अउ शिक्षण के तरीक म व्यापक बदलाव लाने वाला हावय। नवा शिक्षा नीति म पढ़ईया मन के सरी विकास के बात कहे गे हावय, ताकि वो ह शैक्षणिक रूप ले उन्नत हो अउ जीवन म चहुंमुखी प्रदर्शन करके सके। नवा शिक्षा नीति म व्यक्तित्व विकास अउ वोकेशनल एजुकेशन म तको बिसेस धियान दे गे हावय।