तरिया खुदाई म मिलिस योग नृसिंह के जुन्ना मूर्ति, लाल बलुआ पत्थर ले बने 4 थी, 5वीं सदी के मूर्ति

पुरातत्व विभाग

अंजोर.रायपुर, 17 फरवरी। रायपुर जिला के आरंग विकासखण्ड ले गांव कुम्हारी म तरिया गहरीकरण के बखत मिले योग नृसिंह के विरल जुन्ना मूर्ति ल सुरक्षित अउ संरक्षित करे के खातिर संस्कृति अउ पुरातत्व विभाग डहर ले रायपुर के घासीदास स्मारक संग्रहालय म लाये गे हावय। योग नृसिंह के ये जुन्ना मूर्ति लाल बलुआ प्रस्तर ले बने हावय अउ 4थी-5वीं सदी ईसवी के आंके जात हावय। तरिया खनन के बखत गुप्तकालीन पात्र परंपरा के मृदभांड तको पाए गे हावयं।

खनन के बखत गुप्तकालीन मृदभांड

जानबा होवय के 15 फरवरी के सोशल मीडिया म प्रसारित गांव कुम्हारी जिला रायपुर ले खुदाई म बखत नरसिंह के जुन्ना प्रतिमा मिले के खबर के आधार म संस्कृति अउ पुरातत्व विभाग के संचालक ह विभागीय  अधिकारी मनके टीम बनाके मिले प्रतिमा अउ उंकर जगह के निरीक्षण करे के निर्देश दिस। नृसिंह देवता के अनूठी शिल्पाकृति के पुरातत्व विभाग के सौंपे के कार्यवाही म अनुविभागीय अधिकारी (राजस्व) अतुल विश्वकर्मा, आरंग के थाना प्रभारी एल.डी. दीवान सहित उप सरपंच पोखनलाल, डॉ. नंद कुमार, फुलेश्वर साहू,  आशाराम साहू अउ सुरेश साहू के उल्लेखनीय सहयोग रिहिन।