करन खान संग पूजा साहू अउ दिलेश साहू संग ज्योत्सना ताम्रकार के दमदार अदाकारी, खलनायक क्रांति दीक्षित अउ अजय पटेल के एकदम नवा लूक
- फिल्म - कुरूक्षेत्र
- निर्माता/ निर्देशक - उदय कृष्णा
- कलाकार - करन खान, पूजा साहू, दिलेश साहू, ज्योत्सना ताम्रकार, क्रांति दीक्षित, अजय पटेल
सिनेमा। छत्तीसगढ़ी फिल्म ‘कुरूक्षेत्र’ के शूटिंग अब पूरा होगे। मेला के मउका म शिवरीनारायण म आखरी शूट होइस। छॉलीवुड के मशहूर फिल्ममेकर उदय कृष्णा के निर्देशन म ये फिलिम के मुहूर्त शॉट पाछू साल एक निजी होटल म करे गे रिहिस। जिहां सतीश जैन, मोहन सुंदरानी सहित फिलिम ले जुरे टीम अउ जम्मो कलाकार मन जुरियाए रिहिस। कोनोरा काल के सेती शूटिंग थोकिन धीरे चलत रिहिस, फेर दमदार छायांकन के आरो बेरा-बेरा म सोशल मीडिया म आते राहय।
मिले आरो के मुताबिक साई कृष्णा प्रोडक्शन के बैनर तले बने फिल्म कुरूक्षेत्र के निर्माता, निर्देशक उदय कृष्णा हावय अउ अहम किरदार म करन खान, पूजा साहू, दिलेश साहू, ज्योमत्सना ताम्रकार, क्रांति दीक्षित अउ अजय पटेल आदि हावय। शूटिंग के बखत ले फिलिम के गजब सोर उड़त हाबे, पहिली तो कुरूक्षेत्र के स्टोरी दमदार लगत हाबे। कुरूक्षेत्र नाम ले आकब करे तो करन खान अउ दिलेश साहू के संग क्रांति दीक्षित अउ अजय पटेल के एक्शन ह सबला मनोरंजन के संग रोमांचित तको करही।
छॉलीवुड म मया अउ पारिवारिक फिलिम तो बहुत बने हावय फेर कुरूक्षेत्र जइसे हिस्टोरिकल कहानी भी इहां लोगन ल पसंद आही। काबर के अभी के युवा मन छॉलीवुड म तको टॉलीवुड अउ हॉलीवुड सहिक सुवाद लेके आदी होगे हावय। कुरूक्षेत्र के टीम के बताती येमा बहुत अलग अंदाज म नजर आही सबो कलाकार मन, कहानी के संग सबो के लूक म खास काम करे गे हावय। अभी छत्तींसगढ़ म बहुत अकन फिलिम प्रदर्शन् के अगोरा म अटके हावय ये सेती कुरूक्षेत्र के जल्दीअ आए संभावना कमें हावय तभो ले साल के आखीर तक अगोरे जा सकत हाबे।
निर्देशक उदय कृष्णा किथे-
हमर फ़िल्म कुरुक्षेत्र मोर सबो संगवारी मनके सहयोग ले पूरा होगे। टीम के सबो साथी मनला दिल से धन्यवाद करत हवं, उंकर सहयोग के बिना मोर मिशन पूरा नइ हो पातिस। सोशल मिडिया के माध्यम ले आप हमर टीम के हौसला बढ़ायेव तेकरो बर सादर धन्यावाद।
कलाकार करन खान किथे-
हमर कुरुक्षेत्र फिल्म के शूटिंग पूरा होगे। निर्माता निर्देशक उदय जी अउ उंकर पूरा टीम के साथ शूटिंग म गुज़रे बेरा हमेशा मोर खुबसूरत याद म बसे रइही। फेर कभू मउका मिलही तो मैं आप सबो के संग जरूर काम करना चाहू। आप सब जेन मोला सम्मान दिये ओकर बर आभार।
 |
| ajay patel |
 |
| dilesh sahu |
 |
| jyotsana tamrakar |
 |
| karan khan |
 |
| kranti dikshit |
 |
| uday krishna |
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।