महाशिवरात्रि के मउका म दुर्ग के ठकुराइनटोला म लक्ष्मण झूला के भूमिपूजन करही मुख्यमंत्री

अंजोर.रायपुर, 28 फरवरी। महाशिवरात्रि के पावन परब के मउका म मुख्यमंत्री भूपेश बघेल दुर्ग जिला के पाटन म कौही अउ ठकुराइनटोला के मंदिर म भगवान शिव के दर्शन करही। ए मउका म श्री बघेल ठकुराइनटोला म 19 करोड़ 40 लाख रूपिया के लागत ले बने वाला पुल, बाढ़ रोकथाम के खातिर 2 करोड़ 90 लाख रूपिया के रकम ले तटबंध बुता के भूमिपूजन करही। मुख्यमंत्री कौही म जलसंसाधन ले जुरे 52 करोड़ 40 लाख रूपिया के संरचना के भूमिपूजन करही। पाटन विकासखण्ड म जल संसाधन विभाग के लगभग 74 करोड़ रूपिया के लागत के आने-आने बुता के भूमिपूजन तको होही। 

मुख्यमंत्री श्री बघेल पाटन विकासखण्ड के खम्हरिया नाला म छह करोड़ रूपिया के लागत ले बनइया उच्चस्तरीय पुल के, क्रेडा डहर ले ठकुराइनटोला म सौर सामुदायिक सिंचाई योजना मन अउ तरिया भरई योजना मन अउ कौही म सोलर पंप के माध्यम ले तरिया भराई के खातिर 4 करोड़ 9 लाख रूपिया के लागत ले तइयार योजना के लोकार्पण करही। कार्यक्रम म कौही म ही क्रेडा डहर ले खर्रा अउ तर्रीघाट म क्रमशः 89 लाख अउ 57 लाख की लागत ले सोलर पंप के माध्यम ले तरिया भराई योजना के भूमिपूजन होही।

जानबा होवय के पिछली बार मुख्यमंत्री ह ठकुराइनटोला म भगत के सुविधा ल धियान म रखत इहां लक्ष्मण झूला बनाये के घोसना करे रिहिस। लक्ष्मण झूला ल पाछु तट के दूसर तनि लैंडस्केपिंग के बुता तको करे जाही। खम्हरिया नाला म पुल के तइयार हो जाये ले 25 गांव के 50 हजार के आबादी ल लाभ पहुंचही। क्रेडा के योजना मन के माध्यम ले ठकुराइनटोला, सिकोला, तेलीगुण्डरा, जरवाय, खर्रा, तर्रीघाट म बड़े आबादी म किसान मनके खरीफ अउ रबी दुनों ही फसल के खातिर लाभ पहुंचही। भू-जल संवर्धन के संग ही निस्तारी सुविधा तको मिलही।