स्वावलंबन के रसता म स्व-सहायता समूह अमलडीहा के महिला

अंजोर.रायपुर, 23 फरवरी। मुख्यमंत्री भूपेश बघेल के अगुवई म छत्तीसगढ़ सरकार ह केऊ जनकल्याणकारी योजना मन के लागू हावय अउ जमीनी स्तर म येकर क्रियान्वयन म तको पूरा धियान देत हावय। इही कड़ी म राज्य म सुराजी गांव योजना के तको लागू करे गे हावय, जेकर उत्साहजनक परिणाम तको आगू आत हावयं। ये योजना ग्रामीण क्षेत्र म सामाजिक जगृति के मिशाल बनके उभरे हावय। सुराजी गांव योजना के माध्यम ले ग्रामीण अर्थव्यवस्था म सकारात्मक बदलाव देखे ल मिलत हावयं। खासतौर ले ग्रामीण महिला मन के आत्मनिर्भर होए के रसता मिले हावय। स्वावलंबन के रसता म आगू बढ़त महिला मन म बेमेतरा जिला के ग्राम अमलडीहा के स्व-सहायता समूह ले जुड़े महिला एक बानगी हावयं।

जानबा होवय के सुराजी गांव योजना के ले राज्य सरकार ह नरवा, गरुवा, घुरवा, बाड़ी कार्यक्रम के शुरुआत करे हावय। इही क्रम म गौठान के रुरल इंडस्ट्री के रूप म विकसित करे जात हावय। जिहां गोबर ले कई रकम के उत्पाद के निर्माण करे जात हावय। बेमेतरा जिला के ग्राम पंचायत अमलडीहा म सरपंच श्रीमती कुंती देवी के परिश्रम ले ग्रामीण महिला मन के स्व-सहायता समूह ल रोजगार के साधन मिलत हावय। इहां रोशनी स्व-सहायता समूह के महिला मन ह ‘‘जहाँ चाह, वहाँ राह’’  ल चरितार्थ कर दिखाये हावय। रोशनी स्व-सहायता समूह डहर ले वर्मी कम्पोस्ट के निर्माण करे जात हावय जेला बेच के महिला स्व-सहायता समूह के अब तक लाखों रूपिया के आमदनी हो चुके हावय।