अंजोर.रायपुर, 24 फरवरी। छत्तीसगढ़ के अमनज्योति जाहिरे ल राष्ट्रीय बाल वीरता पुरस्कार साल 2021 दे जाही। भारतीय बाल कल्याण परिषद नवा दिल्ली ह कोरबा जिला निवासी अमन ज्योति के चयन ए पुरस्कार के खातिर कर हावय। मुख्यमंत्री भूपेश बघेल अउ महिला अउ बाल विकास मंत्री श्रीमती अनिला भेंड़िया ह साहसी अमनज्योति के चयन राष्ट्रीय पुरस्कार के खातिर होए म ओला बधाई अउ सुभकामना दीस।
जानबा होवय के साहसिक बुता अउ बहादुरी के खातिर लइका ल नगद रकम सहित प्रमाण पाती के संग भारतीय बाल कल्याण परिषद डहर ले हर साल ये पुरस्कार दे जात हावय। कोविड परिस्थिति ल धियान म रखत ये राष्ट्रीय पुरस्कार दे के तिथि के घोसना बाद म करे जाही।
जान म खेल बचाईस संगवारी के जान
कोरबा के 15 साल के अमन ज्योति ह अपन ले उमर म बड़े एक पढ़ईया के जान बचाये रिहिस। एक अगस्त 2021 के फ्रेंडशिप डे के दिन कुछ पढ़ईया मन कोरबा शहर ले लगभग 20 किलोमीटर दूरिहा पिकनिक स्पॉट परसखोला बांध गे रिहिस। एमे ले झरना म हाथ-पैर धोये ल गे एक पढ़ईया आशीष ठाकुर के पैर फिसल गे। फिसल के गिरे के सेती वो ह पानी म बहे लगे। खतरनाक फिसलन वाला चट्टान अउ पानी के तेज धार म आशीष ल बहत देखके सबो संगवारी घबरा गे काबर के ओला तैरना नइ आत रिहिस। ए बीच आसपास के लोगन अउ संगवारी पढ़ईया बहत आशीष ल पानी ले बाहिर निकाले के खातिर जोर जोर ले बचाओ-बचाओ चिल्लाये लगे। पानी म बहत पढ़ईया के खातिर जब कोनो नइ पहुचिस त अमनज्योति ह अपन जान के परवाह न करत पानी म छलांग लगा दीस अउ चट्टान म फिसलत पढ़ईया ल रोक लिस। ओमन अपन सूझबूझ ले कोनो रकम ले बहत पढ़ईया के किनारे म लाइस। येकर बाद वो ह दोस्त मनके मदद ले बेहोश घायल पढ़ईया ल अस्पताल तको लेगे। पढ़ईया जिहां पानी म बहत रिहिन उहां आगू बड़े खाई रिहिस। अमनज्योति पानी म छलांग लगाके बहत पढ़ईया के नइ रोकतिस त बहत खाई म गिर सकत रिहिस। अमनज्योति ल तको तैरना नइ आता रिहिस। अचानक ले युवक ल बचाये के खातिर नदी म कूदे ले उंकर हाथ अउ छाती सहित शरीर म गहरा चोट तको लगे रिहिस।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।