छत्तीसगढ़ ल भारत सरकार डहर ले रासायनिक उर्वरक सप्लाई प्लान के मुताबिक नइ करे जाथे : कृषि अउ जल संसाधन मंत्री श्री रविन्द्र चौबे

अंजोर.रायपुर, 19 फरवरी। छत्तीसगढ़ राज्य ल भारत सरकार डहर ले रबी सीजन 2021-22 के खातिर अब तक मात्र 2 लाख 12 हजार 162 मेट्रिक टन रासायनिक उर्वरक के आपूर्ति करे गिस हावय, जेन ल भारत सरकार डहर ले छत्तीसगढ़ के खातिर अक्टूबर ले फरवरी महीना तक के खातिर जारी सप्लाई प्लान के 52 परतिसत हावय। छत्तीसगढ़ ल भारत सरकार डहर ले रासायनिक उर्वरक के आबंटन स्वीकृत मात्र अउ सप्लाई प्लान के मुताबिक नइ करे जात हावय। 

छत्तीसगढ़ ल केन्द्र सरकार डहर ले मात्र 2.12 लाख मेट्रिक टन उर्वरक के होहे आपूर्ति

कृषि अउ जल संसाधन मंत्री रविन्द्र चौबे ह बताइन के छत्तीसगढ़ शासन डहर ले भारत सरकार ले रबी साल 2021-22 के खातिर 7.50 लाख मेट्रिक टन रासायनिक उर्वरक के मांग करे गे रिहिस। फेर भारत सरकार ह 4.11 लाख मेट्रिक टन उर्वरक छत्तीसगढ़ ल दे जाये के स्वीकृति दीस, जेन ल राज्य के मांग के मात्र 55 परतिसत ही हावय। छत्तीसगढ़ राज्य डहर ले मांग करे  गे उर्वरक के मात्रा म पहिली ही भारत सरकार डहर ले 45 परतिसत के कमी कर दे गे हावय। चालू रबी सीजन के खातिर भारत सरकार डहर ले छत्तीसगढ़ के स्वीकृत 4.11 लाख मेट्रिक टन रासायनिक उर्वरक म यूरिया 2 लाख मेट्रिक टन, डीएपी 60,000 मेट्रिक टन, एनपीके 50,000 मेट्रिक टन, एमओपी 26,000 मेट्रिक टन अउ एसएसपी 75,000 मेट्रिक टन सामिल हावय। 

कृषि मंत्री श्री चौबे ह बताइन के स्वीकृत मात्रा 4.11 लाख मेट्रिक टन के विरूद्ध भारत सरकार डहर ले छत्तीसगढ़ राज्य के अक्टूबर ले फरवरी तक 3 लाख 46 हजार 225 मेट्रिक टन उर्वरक के सप्लाई के प्लान जारी करे गे हावय। सप्लाई प्लान के विरूद्ध छत्तीसगढ़ राज्य ल आज के स्थिति म मात्र 2 लाख 12 हजार 162 मेट्रिक टन रासायनिक उर्वरक के ही आपूर्ति करे गे हावय, जेन छत्तीसगढ़ के खातिर स्वीकृत मात्रा के मात्र 52 परतिसत हावय। ओमन किहिन के छत्तीसगढ़ राज्य के कुल जरूरत  के मुकाबला 4 लाख 36 हजार मेट्रिक टन रासायनिक उर्वरक भारत सरकार डहर ले उपलब्ध कराए जाये के बात गलत अउ भ्रामक हावय।