 |
| सिरपुर महोत्सव |
अंजोर.महासमुंद, 15 फरवरी। महासमुंद जिला के महानदी तट म सिरपुर म 16 फरवरी के दू दिवसीय सिरपुर महोत्सव के आगाज होत हावय। ए महोत्सव म स्थानीय कलाकार मन डहर ले आने-आने सांस्कृतिक कार्यक्रम के अलावा विभागीय योजना मन के कलाजत्था के डहर ले प्रदर्शन करे जाही। महोत्सव के उद्घाटन के मुख्य अतिथि प्रदेस के पर्यटन अउ संस्कृति, खाद्य नागरिक आपूर्ति अउ उपभोक्ता संरक्षण मंत्री अमरजीत भगत करही। उहें समापन 17 फरवरी के मुख्य अतिथि प्रदेस के गृह, लोक निर्माण, जेल, पर्यटन, धार्मिक, न्यास अउ धर्मस्व विभाग अउ जिला के प्रभारी मंत्री ताम्रध्वज साहू डहर ले करे जाही।
16 अउ 17 फरवरी तक होवइया ए आयोजन ल लेके दर्शक के क्षमता के मुताबिक टेंट बेवस्था करे गे हावय। एमे देखइया के बइठे के संग ही ग्रीन रूम के अलावा पास म ही जनसम्पर्क विभाग डहर ले सरकारी योजना मन अउ उपलब्धि म आधारित छायाचित्र प्रदर्शनी तको लगाये जात हावय। उहें स्व-सहायता समूह डहर ले बने समान के स्टॉल तको बिक्री बर सजें हावय।
- 16 फरवरी - पंथी नृत्य, दिशा नाट्य मंच महासमुंद डहर ले नाटक आजादी के अमृत महोत्सव के मंचन होही। कर्मा नृत्य पार्टी खट्टी के कलाकार मन डहर ले कर्मा नृत्य के प्रदर्शन करही। अनंदिता तिवारी के कत्थक एकल नृत्य, लोक छाया के प्रस्तुति होही।
- 17 फरवरी - गांव पचरी के जय सतनाम पार्टी डहर ले पंथी नृत्य के प्रदर्शन होही। नांदबारू सिरपुर के मंडली डहर ले सुआ नृत्य दर्शक ल देखे मिलही। फुलझरिया कर्मा पार्टी बिलखंड बसना कर्मा नृत्य के प्रदर्शन करे जाही। दिशा नाटक मंच के नाटक लेड़गा अउ डेडगा के बोझा के मंचन होही। आर्या नंदे डहर ले ओड़िशी एकल नृत्य के प्रस्तुति होही। येकर बाद अनुज नाइट के आयोजन होही।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।