अंजोर.बलौदाबाजार,2 फरवरी। आबकारी उड़नदस्ता टीम के 2 दिन म ही अवैध दारू बनाये अउ बेचे के अभियान के विरुद्ध बड़े कामयाबी मिले हावय। जेकर तहत अलग-अलग प्रकरण म लगभग 18 लाख रूपिया के अवैध दारू सहित टाटा सफारी अउ आन सामग्री जप्त करे गिस हावय।
ए संबंध म जानकारी देत जिला आबकारी अधिकारी अशोक सिंह ह बताइन के सरसीवां क्षेत्र के सलौनीकला डेरा अउ बिलाईगढ़ क्षेत्र के छेरचुआ सबरिया डेरा म 4 अलग-अलग मामला म कुल 842 लीटर हाथभठ्ठी बने कच्चा महुआ दारू जप्त करे गे हावय। जेकर बाजार कीमत 8 लाख 42 हजार रूपिया हावय। संग ही 12 हजार 200 कि.ग्रा. महुआ लाहन के मउका म ही नष्टीकरण करिन। जेकर बाजार म कीमत लगभग 2 लाख 50 हजार रूपिया हावय।
सरसीवां, बिलाईगढ़ क्षेत्र महुआ दारू के बनाये अउ बेचे बर अतिसंवेदनशील क्षेत्र हावय। ए क्षेत्र म महुआ दारू ले जनहानि के संभावना बने रिथे। इही रकम ले आज ही उड़नदस्ता टीम डहर ले तड़के बिहनिया भाटापारा बस स्टैण्ड के तिर म घेरा बंदी करके संदिग्ध एक टाटा सफारी वाहन क्रमांक सीजी 04 एच.ई. 1791 के रोककर तलाशी लिये जाये म वाहन ले 40 पेटी (1920 नग) मध्यप्रदेस बने देशी दारू मसाला बरामद होइस। जेकर कुल मात्रा 345.6 बल्क. ली. हावय।
जेकर बाजार कीमत 2लाख 11 हजार रूपिया हावय। येकर संग ही अवैध दारू परिवहन म प्रयुक्त वाहन टाटा सफारी के बाजार कीमत 5 लाख जप्त करिन। वाहन चालक राहुल सिखा,निवासी भिलाई सेक्टर 6 के गिरफ्तार करके न्यायिक अभिरक्षा म भेजा गे हावय।आबकारी अधिनियम के धारा 34(2),59(क) अउ धारा 36 के अन्तर्गत प्रकरण कायम करके विवेचना म लिस।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।