भोरमदेव महोत्सव 2022 : बैगा-आदिवासी के पारम्परिक लोक नृत्य ले शुभारंभ होइस

अंजोर.कवर्धा, 30 मार्च। छत्तीसगढ़ कबीरधाम के ऐतिहासिक, पुरात्तविक, धार्मिक, पर्यटन अउ जन आस्था के केन्द्र के नाम ले आयोजित होए वाला भोरमदेव महोत्सव साल 2022 के जिला म निवासरत बिसेस पिछड़ी बैगा जनजाति बैगा-आदिवासी मनके पारम्परिक लोक नृत्य के संग विधिवत शुभारंभ होइस। महोत्सव शुभारंभ ले पहिली प्राचीनतम मंदिर बाबा भोरमदेव शिव जी के बिहनिया काल महाअभिषेक, एक हजार नाम ले सहस्त्रार्चन,रूद्राभिषेक, बिसेस श्रृंगार आरती करे गिस। आन पहर संझा काल म सहस्त्रधारा ले महाभिषेक, श्रृंगार महाआरती-भस्म आरती, शिव सरोवर के आगू भगवान वरूण देव के पूजन, दीपदान, गंगा आरती करे जाही। बाबा भोरमदेव शिव जी के बिसेस आरती म कलेक्टर रमेश कुमार शर्मा, पुलिस अधीक्षक डॉ. लाल उमेंद सिंह, जिला पंचायत सीईओ संदीप कुमार अग्रवाल, डीएफओ चुनामणी सिंह, कवर्धा एसडीएम विनय सोनी, बोड़ला एसडीएम कोरी सहित जिला प्रशासन के टीम, गणमान्य नागरिक अउ सैकड़ों दरस करइया तको सामिल होइन।

बैगा नृत्य के बाद मंदिर प्रागंण म छत्तीसगढ़ के लोक पांरम्परिक अउ कला संस्कृति म अधारित जसगीत, बैगा नृत्य, करमा नृत्य, बांस गीत, राम भजन, शिव आराधना सहित अलग-अलग धार्मिक सांस्कृतिक कार्यक्रम होही। ए बार ए दू दिवसीय महोत्सव म छत्तीसगढ़ अउ भारतीय संस्कृति के अलग-अलग कला विधा के मंच म संगम होवत हावय। दू दिवसीय महोत्सव म छत्तीसगढ़ के कला संस्कृति के संग बॉलीवुड कार्यक्रम के आंनद उठा सकत हावय।