किसान मेला : मुख्यमंत्री भूपेश बघेल करिन अंतर्राष्ट्रीय कृषि प्रदर्शनी के उद्घाटन

अंजोर.रायपुर, 12 मार्च। मुख्यमंत्री भूपेश बघेल ह आज इंदिरा गांधी कृषि विश्वविद्यालय म आयोजित चार दिवसीय अंतर्राष्ट्रीय कृषि प्रदर्शनी अउ किसान मेला के उद्घाटन करिन। ए अंतर्राष्ट्रीय मेला म शासकीय, सार्वजनिक अउ निजी क्षेत्र के 132 संस्था कृषि तकनीक अउ जिनिस के प्रदर्शन करही। मुख्यमंत्री ह मेला के उद्धाटन करत किहिन के पुरख के बताए रद्दा म चले ले कांटा नइ चुभे, प्रदेस के खनिज भंडार अउ प्राकृतिक संसाधन  ले मिले वाला रकम ल सही बाटना ही पुरख के सपना रिहिस जेन अभी के बेरा म साकार हो रिहिन हावय। मुख्यमंत्री ह किहिन के उंकर सरकार ह कभू कोनो तको वर्ग ले भेदभाव नइ करिन अउ छोटे, बड़े सबो किसान मन के कर्ज माफ करिन। मुख्यमंत्री ह किहिन के हमन खेती किसानी अउ किसान मन के आर्थिक स्थिति सुधारे के खातिर राजीव गांधी किसान न्याय योजना सुरू करेन ताकि प्रदेस म ग्रामीण अर्थव्यवस्था गतिशील रिहिन।

छत्तीसगढ़ के किसान मन के आर्थिक स्थिति के बारे म बात करत मुख्यमंत्री श्री बघेल ह किहिन के पाछु तीन साल म किसान मन के खाते म 91 हजार करोड़ रूपिया जमा होए हावयं अउ ये कुल बजट के एक तिहाई हिस्सा हावय जेन किसान मन ल मिले  हावय। मुख्यमंत्री ह किहिन के आज किसान मन के खाता म पइसा बच रिहिन हावयं अउ इही सेती ले गउठान औद्योगिक पार्क म विकसित होवत जात हावयं। मुख्यमंत्री ह किहिन के किसान मन के बेटे, स्थानीय युवा अब छत्तीसगढ़ म उद्योग लगावे अउ सरकार ओला आर्थिक मदद तको करही, इही उदाहरण हावय के सी-मार्ट के जरिए गांव म बने वाला जिनिस अब शहर म बिकना सुरू हो गे हावयं जेला देखत होए सबोच जिला म सी-मार्ट खोले के फइसला लिस हावय।