मुख्यमंत्री भूपेश बघेल 2022-23 के बजट प्रस्तुत करिस, गोबर के ब्रीफकेस म अइस बजट

अंजोर.रायपुर, 9 मार्च। मुख्यमंत्री भूपेश बघेल विधानसभा म वित्तीय साल 2022-23 के बजट प्रस्तुत करिस। ऐसो के बजट कुछ अलगे ठंग ले राखे गिस। सबले जादा गोठबात तो बजट ब्रीफकेस रिहिस जेन गोबर ले बने रिहिस। 

छत्तीसगढ़ बजट म दिखिस गोधन न्याय योजना के प्रभाव

मां लक्ष्मी के चिन्हारी के तौर म बिसेस रूप ले तइयार करे गिस गोधनमय ब्रीफकेस

पर्यावरण संरक्षण अउ आर्थिक सशक्तीकरण के क्षेत्र म बिसेस बुता करइया मुख्यमंत्री भूपेश बघेल ह छत्तीसगढ़ विधानसभा म एक नया इतिहास रच दीस। मुख्यमंत्री भूपेश बघेल ह बजट पेश करे के खातिर जेन ब्रीफकेस के इस्तेमाल करिन वो चमड़ा या जूट के नइ होके गोबर के बाई प्रोडक्ट ले बने हावय। मुख्यमंत्री के डहर ले बजट के खातिर इस्तेमाल करे  गे ब्रीफकेस ल गोबर के पाउडर ले तइयार करे गे हावय जेला महिला स्वसहायता समूह के दीदी नोमिन पाल डहर ले बनाये गे हावय। छत्तीसगढ़ देश के पहिली अइसे राज्य बन गे हावय जेन मां लक्ष्मी के चिन्हारी के रूप म गो-धन ले बने ब्रीफकेस के इस्तेमाल करिन हावय।

नगर निगम रायपुर के गोकुल धाम गउठान बनिस ब्रीफकेस 

नगर निगम रायपुर के गोकुल धाम गउठान म काम करइया ‘एक पहल’ महिला स्वसहायता समूह के दीदी मन ह गोबर अउ आन जिनिस के इस्तेमाल ले ए ब्रीफकेस के बनाये करिन अउ इही ब्रीफकेस म छत्तीसगढ़ के मुख्यमंत्री भूपेश बघेल ह आज विधानसभा म बजट पेश करिन हावय। ए ब्रीफकेस के खासियत ये हावय के एला गोबर पाउडर, चुना पाउडर, मैदा लकड़ी अउ ग्वार गम के मिश्रण के परत दर परत लगाके 10 दिन म तइयार करिन। बजट के खातिर बिसेस तौर म तइयार करे  गे ए ब्रीफकेस के हैयंडल अउ कार्नर कोंडागांव शहर के समूह डहर ले बस्तर आर्ट कारीगर ले तइयार कराये गे हावय।