हाईस्कूल अउ हायर सेकेंडरी के पढ़ाई बनही रोचक

अंजोर.रायपुर, 28 मार्च। छत्तीसगढ़ के स्कूल म अंग्रेजी, गणित अउ विज्ञान विषय के पढ़ाई ल अउ जादा रोचक बनाये के खातिर टाटा इंस्टीट्यूट ऑफ सोशल साइंस मुंबई डहर ले शिक्षक मन ल 9 महीना के हाइब्रिड कोर्स के जरिए प्रशिक्षण दे हावय। ये प्रशिक्षण कोरोना काल के बखत लइका के सीखे के क्षमता म आये कमी ल दूरिहा करे म सहायक सिद्ध होही। प्रशिक्षित शिक्षक कक्षा म पढ़ाई के बखत सूचना संचार प्रौद्योगिकी (आईसीटी) के उपयोग करके पढ़ाई लिखाई ल रोचक बनाही। येकर संग ही आईसीटी तकनीक के बारे म लइका ल तको जानकारी दिही। हाइब्रिड कोर्स के आज समापन समारोह म विषय विशेषज्ञ के संग परिचर्चा अउ विचार-विमर्श करे गिस। हाइब्रिड प्रशिक्षण म सामिल कुल 300 शिक्षक मन के विषय विशेषज्ञ ह कक्षागत शिक्षण म आईसीटी तकनीक अउ एप्प के उपयोग के जानकारी दीस अउ ओला येकर उपयोग के खातिर प्रोत्साहित करिन। 

जानबा हावय के राज्य म समग्र शिक्षा के तहत प्राथमिक अउ माध्यमिक स्कूल मन के शिक्षक मन के एक-दूसर ले सीखे के मउका अउ मंच दे के खातिर प्रोफेशनल लर्निंग कम्यूनिटी के गठन करे गे हावय। प्रारंभिक स्तर म ये कम्यूनिटी काफी हद तक सफल रही हावय अउ जमीनी स्तर म काफी बदलाव लात हावय। अब एला हाईस्कूल अउ हायर सेकेंडरी स्तर म तको लागू करे जात हावय। येकर ले हाईस्कूल अउ हायर सेकेंडरी म पढ़त लइका के अंग्रेजी, गणित अउ विज्ञान विषय के पढ़ाई रूचिपूर्ण बनाये म मदद मिलही। पढ़ाई के खातिर प्रशिक्षित शिक्षक सूचना संचार प्रौद्योगिकी अउ एप्प उक के उपयोग करही।