मनरेगा म लेबर बजट बढ़ाये के छत्तीसगढ़ के प्रस्ताव ल केन्द्रीय ग्रामीण विकास मंत्रालय के मंजूरी

अंजोर.रायपुर,17 मार्च। केन्द्रीय ग्रामीण विकास मंत्रालय ह छत्तीसगढ़ म मनरेगा (महात्मा गांधी राष्ट्रीय ग्रामीण रोजगार गारंटी अधिनियम) के लेबर बजट म दू करोड़ 22 लाख मानव दिन के बढ़ोतरी के मंजूरी दे हावय। अब प्रदेस म चालू वित्तीय साल 2021-22 के खातिर मनरेगा के तहत रोजगार सिरजन के लक्ष्य साढ़े 13 करोड़ मानव दिन ले बढ़के 15 करोड़ 72 लाख मानव दिन हो जाही। राज्य शासन के पंचायत अउ ग्रामीण विकास विभाग के वरिष्ठ  अधिकारी मन अउ भारत सरकार के ग्रामीण विकास मंत्रालय के सचिव अउ आन  अधिकारी मनके बीच हाल ही म होए बइठक म छत्तीसगढ़ म लेबर बजट बढ़ाये के प्रस्ताव ल मंजूरी दीस। जानबा होवय के प्रदेस म ए साल अब तक मनरेगा ले 28 लाख ले जादा परिवार ल करीब 54 लाख पांच हजार मजदूर ल काम दे हावय। ए बखत चार लाख 75 हजार 374 परिवार के 100 दिन ले जादा के रोजगार तको मुहैया कराये गे हावय।