ठाकुराईन टोला म लक्ष्मण झूला के भूमिपूजन अउ पाटन ले नोनी सशक्तिकरण योजना के शुभारंभ

अंजोर.रायपुर, 1 मार्च। मुख्यमंत्री भूपेश बघेल ह आज दुर्ग जिला के पाटन विकासखण्ड के गांव ठाकुराईन टोला मं  महाशिवरात्रि के पावन मउका म भगवान भोलेनाथ के दर्शन करके क्षेत्रवासी मन के 31 करोड़ 63 लाख रूपिया के आने-आने बनाये बुता के सौगात दीस। एमे 19 करोड़ 40 लाख रूपिया के लागत ले बने वाला लक्ष्मण झूला अउ 2 करोड़ 75 लाख के लागत ले बने वाला खारुन नदी के तटबंध तको सामिल हावय। 

सोनपुर म एक करोड़ 40 लाख के लागत ले बने वाला ग्लेजिंग यूनिट के भूमिपूजन तको ओमन करिन। येकर ले कुम्हार मनला काफी सुविधा होही। मुख्यमंत्री ह ठाकुराईन टोला म ही क्रेडा के सामुदायिक सिंचाई योजना के लोकार्पण तको करिन। येकर ले सिकोला अउ ठाकुराईन टोला म किसान मन के खेत म तरिया के माध्यम ले जल पहुंचही। येकर अलावा ओमन 6 करोड़ 86 लाख के स्वास्थ्य ले संबंधित आने-आने बुता के लोकार्पण तको करिन।

पाटन ले मुख्यमंत्री नोनी सशक्तिकरण योजना के करिन शुभारंभ

मुख्यमंत्री भूपेश बघेल ह ए मउका म पाटन ले छत्तीसगढ़ भवन अउ आन सन्निर्माण कर्मकार कल्याण मण्डल के नोनी सशक्तिकरण योजना के शुभारंभ करत 16 हितग्राही बेटी मन ल 20-20 हजार रूपिया के चेक सौंपे। पाटन ले सुरू होए ए योजना के तहत मजदूर परिवार की बेटी मनके शिक्षा, रोजगार, स्वरोजगार अउ बिहाव म मदद के खातिर छत्तीसगढ़ भवन अउ आन सन्निर्माण कर्मकार कल्याण मण्डल म पंजीकृत हितग्राही मन के पहिली दू बेटी के बैंक खाते म 20-20 हजार रूपिया के रकम के भुगतान एकमुश्त करिन।