मार डारे मया म फिल्म के का हाबे कहानी, पढ़व अंजोर म... 8 अप्रेल के रिलीज होही अनुज अउ लिप्सा के मूवी Maar Daare Maya Ma

अंजोर.सिनेमा। छत्तीसगढ़ी फिल्म मार दारे माया मा एक रोमांटिक एक्शन फिल्म आए। येमा अनुज शर्मा, लिप्सा मिश्रा अहम किरदार म हाबे। गजेंद्र श्रीवास्तव प्रोडक्शंस के बैनर तले बने फिल्म के निर्माता गजेंद्र श्रीवास्तव अउ मनीष मानिकपुरी येला निर्देशित करे हाबे। फिल्म अनुज शर्मा अउ लिप्सा मिश्रा के अलावा पुष्पेंद्र सिंह, अंजलि चौहान, सुनील तिवारी, पूरन किरी, ज्योत्सना ताम्रकर, क्रांति दीक्षित, प्रदीप शर्मा, अमित शर्मा, योगेश अग्रवाल, गिरवरदास मानिकपुरी, नवलदास मानिकपुरी, नमित, अमित शर्मा, राजेश पंड्या अउ दिव्या यादव तको नजर आही।

कहानी- 

फिल्म के कहानी शुरू होथे, आफिस के दू झिन चपरासी ले जेन मन गांव ले काम करे बर शहर आए रिथे। एक चपरासी हाबे नायक अनुज शर्मा जेकर सत्तू नाम रिथे दूसर हाबे क्रांति दीक्षित जेन ये पइत सिनेमा म खलनायकी नइ कर करत हाबे। उही आफिस म लिप्सा मिश्रा यानी माया मेडम तको हाबे जेन उंकर बड़का साहब हाबे। दूनो के बीच प्यार के लफड़ा-झफड़ा हास्य अउ मनोरंजक हावय। भई कहानी म नौकर अउ मालिक के प्रेम अइसे कइसे होगे। 

ये बात के आरो आगू आप मन ल तब चलही जब अब गांव के बड़का जमीदार पूरण किरी के फिलिम म इंट्री होही। पूरण किरी अपन जमीन ल कोनो ल नइ देके बात करथे। अऊ विलेन मन कोनो भी तरीका ले ओ जमीन ल हड़पे के पै चरथे। इही पै एक किरदार रिथे सत्तू जेकर संग माया ह बिहाव करथे। अऊ बिहाव के असल भेद ल सबले पहिली समझथे क्रांति दीक्षित किथे ये कोनो प्यार नोहय बल्कि येकर पीछु बहुत बड़े कारण हावय। 

प्यार अउ बिहाव तक तो फिलिम धीरे-धीरे मनोरंजन करत रिथे फेर बिहाव के बाद अचानक कहानी म नवा मोड़ आथे अउ फिलिम म धमाका होए लगथे। प्यार अउ रोमांस के बीच एक्शन आये ले फिलिम म अउ गजब आनंद आथे। अभी पूरा कहानी नइ बता सकन काबर के आप सबला अभी फिलिम ल तको देखे बर जाना हाबे। तो तारीख ल झन भलाहू 8 अप्रेल 2022 के टाकीज म देखे बर खंचित आहू। 

फिलिम म का हाबे नवा-

फिलिम मार डारे मया मा के अलग अंदाज के बात करे तो लिप्सा मिश्रा के किरदार देखे के लइक हावय। लिप्सा उड़ीसा के कलाकार आए छत्तीसगढ़ी म ये ओमन के पहिली फिलिम रिलीज होवत हाबे। लिप्सा वैसे तो केऊ भासा म काम करे हावय लेकिन छत्तीसगढ़ी उंकर बर सरल होइस होही काबर के भोजपुरी हिन्दी वाले छत्तीसगढ़ी ल आसानी ले समझ जथे। 

दूसर खास बात हाबे क्रांति दीक्षित के किरदार, काबर के ओमन येमा खलनायक के भूमिका म नहीं बल्कि हीरो के दोस्त के किरदार म हाबे। अब क्रांति ल खलनायक के रूप देखने वाले मन हीरो के दोस्त के रूप म कतका पसंद करथे ये तो फिलिम आये के बाद ही पता चलही। वइस क्रांति दीक्षित के यहू फिलिम म जोरदार रोल म हाबे। अब सुनील तिवारी के बात करे जाए तो सुनील येमा विलेन के रूप म हाबे, नायिका संग मिलके हीरो ले धोखा दे के पै रचथे।

गीत/संगीत- 

फिल्म मया म मार डारे के गीत संगीत बहुत ही मधुर हाबे। एक गीत फूल हासन लागे दारी तो सोशल मीडिया म खूब धमाल मचावत हाबे। येकर टाइटल सांग तको गजब नीक हाबे।