मुख्यमंत्री के अध्यक्षता म गौ-मूत्र खरीदी के संबंध म होइस बइठका

अंजोर.रायपुर, 30 मार्च। छत्तीसगढ़ म गोबर खरीदी के बाद अब गौ-मूत्र के खरीदी के संबंध म राज्य सरकार गंभीरतापूर्वक विचार करत हावय। मुख्यमंत्री भूपेश बघेल के अध्यक्षता म उंकर निवास कार्यालय म आयोजित बइठक म गौ-मूत्र के खरीदी के आने-आने पहलु म विस्तार ले विचार-विमर्श करे गिस। मुख्यमंत्री ह गौ-मूत्र खरीदी के आने-आने पहलु के अध्ययन करे के खातिर टेक्निकल कमेटी के गठन के निर्देश दिस। ए कमेटी म इंदिरा गांधी कृषि विश्वविद्यालय अउ कामधेनु विश्वविद्यालय के विशेषज्ञ के तको सामिल करे जाही। मुख्यमंत्री ह ए कमेटी के गठन के बाद 15 दिन म प्रतिवेदन प्रस्तुत करे के निर्देश दे हावयं। ये टेक्निकल कमेटी गौ-मूत्र के संग्रहण, गौ-मूत्र के गुणवत्ता के टेस्टिंग, गौ-मूत्र ले तइयार करे  जाये वाला जिनिस के बारे म अपन अनुशंसा देही। 

बैठक म मुख्यमंत्री भूपेश बघेल ह गउठान म विकसित करे  जाये वाला महात्मा गांधी रूरल इंडस्ट्रियल पार्क के स्थापना के खातिर आने-आने जिला  म स्थानीय स्तर म उपलब्ध कच्चे माल अउ उंकर ले तइयार करे  जाये वाला जिनिस के खातिर पोटेंशियल मैपिंग के बुता 15 दिन म पूरा करे के निर्देश  अधिकारी मनला दे हावयं। जानबा होवय के रूरल इंडस्ट्रियल पार्क म स्थानीय खाद्य जिनिस अउ लघु वनोपज के कीमत संवर्धन के खातिर प्रसंस्करण इकाई के स्थापना करे जाना हावय। येकर खातिर राज्य सरकार के साल 2022-23 के बजट म 600 करोड़ रूपिया के प्रावधान करे गे हावय। ए रकम ले रूरल इंडस्ट्रियल पार्क म जरूरी अधोसंरचना, बिजली, पानी अउ प्रसंस्करण इकाई के सुविधा विकसित करे जाही।