राज्य सरकार आदिवासी समाज के उत्थान के खातिर संकल्पित : श्री भूपेश बघेल

अंजोर.रायपुर, 17 अप्रैल। मुख्यमंत्री भूपेश बघेल आज गरियाबंद जिला के छुरा विकासखंड के गांव बोडराबांधा म आयोजित अखिल भारतीय गोंड समाज के महाधिवेशन म बतौर मुख्य पहुना सामिल होइन। मुख्यमंत्री भूपेश बघेल ह महाधिवेशन के संबोधित करत किहिन के राज्य सरकार आदिवासी समाज के विकास अउ उंकर हित खातिर दृढ़ संकल्पित हावय। येकर खातिर केऊ योजना लागू के गे हावयं। ओमन किहिन के हमर सरकार ह समर्थन कीमत म खरीदी जाये वाला लघु वनोपज के संख्या 7 ले बढ़ाके 65 करे हावय। अब कोदो, कुटकी, रागी के समर्थन कीमत म खरीदी करे जात हावय। राजिम विधायक अमितेष शुक्ल ह किहिन के कोनो तको क्षेत्र म सड़क,बिजली अउ सिंचाई सुविधा के विकास ले हर समाज के विकास सुनिश्चित होथे हावय। इही ध्येय ल लेके मुख्यमंत्री श्री बघेल विकास ल गति दे हाबे।ओमन अमात गोंड समाज भवन के खातिर 10 लाख रूपिया दे के घोसना करिस।

केन्द्रीय समिति बिंद्रानवागढ़ ले आयोजित ए कार्यक्रम म आदिम जाति कल्याण मंत्री डॉ. प्रेम साय सिंह टेकाम, संसदीय सचिव अउ आदिवासी समाज के राष्ट्रीय अध्यक्ष शिशुपाल सोरी, संसदीय सचिव इन्द्रशाह मंडावी, अंतागढ़ विधायक अनूप नाग, राजिम विधायक अमितेष शुक्ल, पूर्व विधायक ओंकार शाह अउ समाज के प्रमुख पदाधिकारी अउ बडी संख्या म समाज के प्रतिनिधि मौजूद रिहिस।