बेलगहना अउ रतनपुर ल तहसील के दर्जा दे म नागरिक मन मुख्यमंत्री के प्रति प्रकट करिन आभार

अंजोर.बिलासपुर,29 अप्रैल। मुख्यमंत्री भूपेश बघेल ले उंकर निवास कार्यालय म बिलासपुर जिला के बेलगहना अउ रतनपुर ले आए नागरिक के प्रतिनिधि मंडल ह छत्तीसगढ़ पर्यटन मंडल के अध्यक्ष अटल श्रीवास्तव के अगुवई म सौजन्य मुलाकात करिस। ओमन बेलगहना अउ रतनपुर के तहसील के दर्जा दे म  मुख्यमंत्री के प्रति आभार प्रकट करिन। ए मउका म कृषि अउ जलसंसाधन मंत्री रविन्द्र चौबे तको उपस्थित रिहिस।

मुख्यमंत्री श्री बघेल ह प्रतिनिधि मंडल के संबोधित करत किहिन के कोरोना संकट के चुनौती के बाद तको राज्य सरकार जनता ले करे वायदा ल पूरा करत हावय। राज्य सरकार के ये प्रयास हावय के आम जनता के शिक्षा, स्वास्थ्य, रोजगार के अच्छा मउका मिलें। व्यवस्था चुस्त-दुरुस्त हों जेकर ले आम जनता के बुता बिना कोनो दिक्कत के आसानी ले हो सके। ओमन किहिन के राज्य सरकार ह प्रशासन के जनता के लकठा लाने के खातिर 6 नवा जिला  अउ 85 नवा तहसील के घोसना करे गे हावय। एमे ले गौरेला-पेण्ड्रा-मरवाही जिला गठित करे जा चुके हावय अउ बांचे जिला  के गठन के प्रक्रिया सुरू करे गे हावय। घोषित के गे तहसील म ले 52 तहसील सुरू हो गे हावय। सरकार के एक कार्यकाल म 85 नवा तहसील के घोसना करे गे हावय। नवा तहसील के गठन ले राजस्व संबंधी बुता म लोगन ल सहूलियत होही। आय, जाति प्रमाण पत्र बनाये, जमीन ले जुड़े मामला के आसानी ले निपटारा हो सकही।