नक्सली मन संविधान म भरोसा करस तभे उंकर ले बात करे जा सकत हाबे : मुख्यमंत्री श्री भूपेश बघेल

अंजोर.रायपुर, 7 मई। मुख्यमंत्री भूपेश बघेल ह प्रेस वर्ता म किहिन के नक्सली भारत के संविधान म विश्वास व्यक्त करें, फेर उंकर ले कोनो भी मंच म बात के जा सकत हावै। मुख्यमंत्री प्रतापपुर म आयोजित प्रेसवार्ता म मीडिया करमी के सवाल के जवाब देत रिहिन रिहिस। ओमन किहिन के नक्सल प्रभावित क्षेत्र म राज्य सरकार के योजना मन म आदिवासी मन के दिल जीते हावय। अब उहां सड़क बनाये अउ कैम्प खोले के मांग लोगन करत हावयं। राज्य सरकार के नीति ले अब नक्सली एक छोटे क्षेत्र म सिमट के रही गे हावयं। ए मउका म नगरीय प्रशासन अउ विकास मंत्री डॉ.शिवकुमार डहरिया अउ स्कूल शिक्षा मंत्री डॉ.प्रेमसाय सिंह टेकाम तको उपस्थित रिहिस।

मुख्यमंत्री ह प्रेसवार्ता म पाछु तीन दिन म सरगुजा संभाग के तीन विधानसभा क्षेत्र सीतापुर, रामानुजगंज, प्रतापपुर विधानसभा क्षेत्र के 9 गांव के भ्रमण के जानकारी दीस। मुख्यमंत्री ह प्रतापपुर म एग्रीकल्चर कॉलेज अउ अपर कलेक्टर लिंक कोर्ट सुरू करे के घोसना करिस।

मुख्यमंत्री ह प्रतापपुर म पत्रकार भवन के खातिर 10 लाख रूपिया के स्वीकृति के घोसना करिस। जानबा हावय के राज्य सरकार डहर ले वरिष्ठ मीडिया कर्मी के सम्मान निधि 5 हजार रूपिया ले बढ़ाके 10 हजार रूपिया करके देगे हावय अउ येकर पात्रता के उमर सीमा 62 साल ले घटाके  60 साल करे हावय। राज्य सरकार डहर ले पत्रकार मनके पत्रकार कल्याण के तहत आर्थिक मदद के सीमा 50 हजार रूपिया ले बढ़ाके 2 लाख रूपिया करे गे हावय। इही रकम ले नवा  अधिमान्यता नियम लागू करे  गे हावयं, जेमा टी.व्ही. चैनल, वेबपोर्टल, समाचार पत्रिका अउ समाचार एजेंसी के पत्रकार ल तको अधिमान्यता दे के प्रावधान करे गे हावय।

मीडिया संस्थान के खातिर अधिमान्यता कोटा करीब-करीब दू गुना कर दे हावय। पहिली बार विकासखण्ड स्तर के पत्रकार के खातिर तको अधिमान्यता के प्रावधान करे गे हावय। कोरोना म दिवंगत मीडिया प्रतिनिधि मन के घर वाला के 5 लाख रूपिया के आर्थिक मदद के प्रावधान करे गे हावय। पत्रकार के अधिमान्यता बखत एक साल ले बढ़ाके दू साल के गे हावय।