लव लेटर नाम ले उत्तम तिवारी के निर्देशन म बने छत्तीसगढ़ी फिलिम अगामी 17 जून 2022 ले प्रदर्शित होही। लव के एक्सपर्ट उत्तम तिवारी आई लव यू अउ आई लव यू टू तको बना चुके हावयं, अब वो ईरा फिल्मस् अउ मां फिल्मस् के बैनर तले ‘लव लेटर’ देखइया के बीच लात हावयं।
लव लेटर म ए बार मन कुरैशी के संग सृष्टि तिवारी हावय। संग म हेमलाल कौशल, शीतल शर्मा, उपासना वैष्णव, धमेंद्र चौबे, विनय अम्बष्ट, पुष्पेंद्र सिंह, सलीम अंसारी, ललीत उपाध्याय, सरला सेन, संतोष जैन, पूजा देवांगन, विक्रम राज के तको दमदार भूमिका हावय। सृष्टि के बतौर नायिका ये पहिली फिलिम हावय। सृष्टि तिवारी छॉलीवुड के नवोदित अदाकारा हावय, वइसने लव लेटर एक साल जुन्ना फिलिम हावय जेन तकनीकी सेती ले 17 जून 2022 के प्रदर्शित होत हावय। मन कुरैशी के ए साल के तीसरइया फिलिम हावय, आगू अउ तको फिलिम के लाइन हावय।
2022 के शुरूआत ले ही प्रेम प्रधान फिलिम ही चलन म हावय। कहानी ले लेके टाईटल अउ गीत युवा मन के ही आकर्षित करे खातिर बनाये जात हावय। कुछ फिलिम चलत तको हावय। शायद निर्माता/ निर्देशक युवा देखइया ल ही धियान म रख करके फिलिम बनात रिहिन हावयं।
लव लेटर के कहानी के बात करे त ये कॉलेज टाईम लव के प्रतिनिधत्व करत हावय। दू युवा दिल नोक-झोंक के बाद प्रेम के रंग म रंगते हावयं। बीच म फैमिली के विवाद कुछ अलग मनोरंजन दे के कोशिश करत हावय। प्रेम गीत झुमने के मजबूर करत हावय। कुल मिले कर नायक अपन प्रेमिका के पा लेता हावय अउ फिलिम के सुखांत होथे हावय। हांलाकि अभी लव सिरीज के दौर हावय फेर ए बीच युवा दिलवाले अलग-अलग अंदाज म प्रेम के कहानी के देखके मनोरंजन करत हावयं। 17 जून ले रिलीज होवइया लव लेटर ल तको युवा खूब पसंद करही अइसे उम्मीद हावय।
- फिल्म - लव लेटर
- निर्माता - अमित जैन, तरूण सोनी
- निर्देशक - उत्तम तिवारी
- कहानी - तरूण सोनी
- गीत/संगीत - उत्तम तिवारी
- छायांकन - तोरण राजपूत
- कलाकार - मन कुरैशी, सृष्टि तिवारी, हेमलाल कौशल, शीतल शर्मा, उपासना वैष्णव, धमेंद्र चौबे, विनय अम्बष्ट, पुष्पेंद्र सिंह, सलीम अंसारी, ललीत उपाध्याय, सरला सेन, संतोष जैन, पूजा देवांगन, विक्रम राज
- बैनर- ईरा फिल्मस् मां फिल्मस्
- कोरियोग्राफर - निशांत उपाध्याय, विलास राउत
- संपादक - प्रीति सिंह
- रिलीज - 17 जून 2022
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।