Dhamtari District : यूपीएससी म चयनित होइन धमतरी जिला ले तीन प्रतिभा, कलेक्टर अउ एसपी ह करिन सम्मान

अंजोर.धमतरी,ए। ए साल यूपीएससी म जिला के तीन युवा मनके चयन होइस हावय। जेमा इशू अग्रवाल 81 रैंक, प्रखर चंद्राकर के 102, कु. पूजा साहू ह 199 रैंक हासिल करिस। आज तीनों चयनित युवा मनके कलेक्टर पी.एस.एल्मा अउ पुलिस अधीक्षक प्रशांत ठाकुर ह सुरता चिनहा अउ पुष्प गुच्छ देके सम्मान करिन। ए मउका म कलेक्टर ह तीनों युवा मनला भावी सरकारी दायित्व के खातिर अग्रिम सुभकामना देत यूपीएससी जइसे सेवा म चयनित होए म बधाई दीस।

धमतरी शहर के शांति कोलोनी निवासी टिंबर व्यवसायी विजय अग्रवाल अउ श्रीमती सविता अग्रवाल (गृहिणी) के पुत्र इशू अग्रवाल, जो के  पेशा ले चार्टर्ड अकाउंटेंट अउ यूपीएससी म 81 वां रैंक हासिल करे हावयं ओला सम्मानित करे गिस। उहें कलेक्टर कार्यालय म पदस्थ निर्वाचन पर्यवेक्षक ओमप्रकाश चंद्राकर अउ श्रीमती चंपा चंद्राकर (सहायक शिक्षक) के एनआईटी रायपुर ले बी.टेक अउ रेलवे म सहायक अभियंता के पद म पदस्थ पुत्र प्रखर चंद्राकर जेन मन 102 रैंक मिले करिन  अउ मगरलोड, भैंसमुंडी निवासी सेवानिवृत्त विकासखण्ड शिक्षा अधिकारी नम्मू राम साहू, श्रीमती चंद्रकुमारी(गृहिणी) के एनआईटी रायपुर ले बायो केमिकल अउ कॉलेज म गोल्ड मेडल नोनी कु. पूजा साहू ल तको सम्मानित करे गिस। कु. पूजा ह यूपीएससी म 199 रैंक पाये हावय।

ये तीनों यूपीएससी चयनित मन ह अपन सफलता के श्रेय अपन माता-पिता के देत उम्मीद जताईस के आने वाला समय म जिला के अऊ यूपीएससी म चयनित होही। ए मउका म पुलिस अधीक्षक ठाकुर ह तको तीनों यूपीएससी चयनित मनला बधाई देत हमेशा माता-पिता डहर ले उंकर खातिर करे  गे त्याग अउ प्रेम के सुरता रखे अउ लोगन के भलाई के खातिर काम करे बर प्रेरित करिन।